Plaaswerkerstaking: Kaap relatief rustig
2012-12-04 12:41
Kaapstad – Daar was teen vroegmiddag geen berigte oor ernstige geweld wat met 'n voortgesette staking deur plaaswerkers in die Wes-Kaap verband hou nie, het Agri Wes-Kaap Dinsdag gesê.
"Die enigste insident waarvan ons tot dusver gehoor het, het in Groendal, Franschhoek plaasgevind, waar 'n groep mense klippe gegooi het na 'n vragmotor vol mense wat op pad was werk toe," het Porchia Adams, 'n woordvoerder vir Agri Wes-Kaap, gesê.
Die polisie het ingegryp en die groep is uitmekaar voor enigiemand beseer is.
Adams kon nie berigte bevestig dat twee plaaswerkers met rubberkoeëls geskiet is nie.
'n Groep mense het vroegoggend in Worcester gesing, gedans en buitebande verbrand.
Kapt. Mzikayise Moloi, woordvoerder vir die Worcester-polisie, het gesê die brand is geblus en die situasie is onder beheer.
Andre Traut, woordvoerder vir die Wes-Kaap, het ook gesê geen gevalle van ernstige geweld is aangemeld nie.
Plaaswerkers eis 'n daaglikse loon van R150 en beter lewensomstandighede.
Gewelddadige stakings deur die werkers het in November deur groot dele van die provinsie versprei.
– Volg Nuus24 op Twitter.
- SAPA
