Plaaswerkers teiken joernaliste, polisie

2013-01-14 11:22

Johannesburg – ‘n Motor van die SABC is deur stakende plaaswerkers op De Doorns in die Wes-Kaap met klippe bestook, het die openbare uitsaaier berig.

Die verslagspan was besig om onderhoude met werkers by die Stofland- informele nedersetting te voer, toe die voertuie met klippe bestook is.

Niemand is beseer nie.

‘n Ander joernalis se voertuig is verlede week tydens die gewelddadige betoging aan die brand gesteek.

Dié motor, wat behoort het aan Independent Newspapers, is deur die Cape Times-joernalis Xolani Koyana gebruik.

Koyana het gesê hy moes uit sy motor na veiligheid getrek word ná betogers dit met klippe bestook het. Hy en 'n ander verslaggewer was in die motor toe betogers hulle omsingel het en aangesê het om die gebied te verlaat.

Die polisie het vroeër gesê een van sy voetpatrollies is vroegoggend op De Doorns oorval.

Ao. November Filander sê die polisiebeamptes is Maandagoggend omstreeks 03:00 aangeval toe hulle die gebied gepatrolleer het.
 
Volg Nuus24 op Twitter

- SAPA