Plaaswerker sterf, vee vrek in Colesberg-brande
2011-11-10 08:05
Colesberg – Minstens een mens is dood en honderde stuks vee het omgekom in ’n vlammehel wat gister nog hier gewoed het.
Tussen 60 000 ha en 70 000 ha weiding is ook vernietig in moontlik die grootste veldbrand wat die Colesberg-distrik tot nog toe beleef het. Die brand het Dinsdagoggend begin.
Boere het gesê die grootste verlies is die dood van Isak Hugo (23), ’n werker van die plaas Kaya Lami. Lulu Mxekezo, woordvoerder van die Noord-Kaapse gesondheidsdepartement, het gesê hy het brandwonde oor 90% van sy lyf opgedoen.
Volgens Anthony Murray, voorsitter van die brandkomitee van die Colesberg-boereunie, moet die boere nog vasstel presies hoeveel van hul vee in die brande gevrek het. “Groot verliese word verwag.”
Murray van die plaas Slingersfontein het gesê sowat 30 van sy skape het doodgebrand. Tientalle van sy ander skape het ook sleg gebrand en kan moontlik binne enkele dae ook vrek. Nagenoeg 3 500 ha van sy plaas is vernietig.
Die brand het aan die oostekant van Colesberg begin. Clem Olivier, voorsitter van die boere-unie, het gesê ’n trein het vermoedelik ’n vonk laat opspring wat die veld aan die brand gesteek het. Die vlamme is aangeblaas deur winde wat Dinsdag tot 43 km/h en Woensdag tot 32 km/h gewaai het.
Mader Osler berig ’n span brandbestryders is Woensdag uit die Oos-Kaap daarheen gestuur.
– Volg Nuus24 op Twitter
- Die Burger