Plaaswerker kon nie Attie waarsku, hoor hof
2011-06-02 18:01
Bloemfontein – 'n Plaaswerker was te ver van die boer Attie Potgieter om hom te waarsku oor die aanval op sy gesin, het die Hooggeregshof in Bloemfontein Donderdag gehoor.
Potgieter, sy vrou en tweejarige dogter is op 1 Desember op hul plaas naby Lindley aangerand en vermoor.
Stemmer Mofokeng, 'n plaaswerker op Potgieter se plaas, Tweefontein, en vyf ander mans staan tereg op drie aanklagte van moord, een van roof met verswarende omstandighede en aanklagte wat verband hou met die onwettige besit van vuurwapens en ammunisie.
In sy verdediging het Mofokeng Donderdag getuig dat hy die dag van die moorde in die tuin gewerk het.
Hy het die honde by 'n mede-plaaswerker se huis hoor blaf en ondersoek gaan instel.
Mofokeng het drie mans, waarvan een 'n vuurwapen en panga gehad het, na die plaashuis sien loop.
Terwyl hy na die skuur gehardloop het om die ander plaaswerkers – sy medebeskuldigdes Klaas Mofokeng en Paulus Khumalo – van die mans te vertel, het hy Attie Potgieter sien aankom.
"Jy het nie Attie van die mense op die plaas gewaarsku nie?" het adv. Lawrence Tshabalala, Klaas Mofokeng, se regsverteenwoordiger gevra.
"Ons was op verskillende plekke, en het in verskillende rigtings gegaan," het Stemmer Mofokeng geantwoord. Hy het ook gesê indien hy Attie sou waarsku, sou hy na die gewapende mans hardloop.
Hy het aan die hof gesê hy het gesien hoe sy medebeskuldigde Tshekolo Lelala, wat 'n panga gehad het, Potgieter in die rigting van die skuur jaag.
Hy het gesien dat Potgieter te sterk was vir Lelala en gesien hoe Potgieter hom (Lelala) grond toe slaan.
Nóg 'n medebeskuldigde, Telleko Seekoei, het toe aangekom en Potgieter in die rug gesteek met 'n voorwerp wat lyk soos 'n mes.
Adv. Chris Gerber wat namens Stemmer Mofokeng optree, het gesê een van sy medebeskuldigdes beweer hulle het hom uit die plaashuis sien kom met 'n rewolwer.
"Dit is 'n leuen," het Stemmer Mofokeng getuig.
Die saak duur voort.
Volg Nuus24 op Twitter
- SAPA