Plaasrower kry 12 jaar
2010-07-07 04:21
Johannesburg – Regter Achmat Jappie het Dinsdag gesê plaasaanvalle vind heeltemal te gereeld plaas, toe hy ‘n plaasrower tot 12 jaar tronkstraf gevonnis het.
Sibenelo Zungu (25) het skuldig gepleit op die aanklag dat hy in Desember 2009 by die plaashuis van Francis (76) en Gillian Howard (75) ingebreek het.
Hy het ook aan die hof gesê dat hy twee medepligtiges gehad het wat hom gehelp het. Dié verdagtes moet nog in die hof verskyn.
Een van die mans het verskeie skote in die huis ingeskiet alvorens hulle die deur afgeskop het.
Zungu het getuig dat die Howard-egpaar hulself in hul slaapkamer toegesluit het nadat die skote afgevuur is.
Met sekuriteitsbeamptes se aankoms op die toneel was die verdagtes in die kombuis besig om vleis vir hulself te braai. Die mans het op die vlug geslaan en meeste van die besittings in die huis agtergelaat wat hulle beplan het om te steel.
Volgens Jappie het die omstandighede egter nie ‘n lewenslange tronkstraf vir die gewapende roof regverdig nie.
Na bewering het Zungu nie die aanval gelei nie en het hy reeds bewys dat hy skuldig voel oor wat hy gedoen het. Hy het ook sy volle samewerking aan die polisie gebied.
Zungu het gesê hy is bereid om teen sy medepligtiges te getuig.
Volg Nuus24 op Twitter.
- SAPA