Plaasmoordenaars 'was professioneel'
2009-12-08 08:56
Malani Venter
Stellenbosch - Alles dui daarop dat die moordenaars van Pieter Malan Cillie (51) van Ceres presies geweet het wat hulle doen.
Só het ’n familielid gister aan Die Burger gesê oor Cillie, wat Vrydagnag in sy plaashuis doodgeskiet is.
Dié vrugteboer van die plaas Lorraine, sowat ’n kilometer buite Ceres, is drie keer geskiet toe ’n onbekende aantal mans die kombuisdeur oopgeskop en Cillie in sy huis oorval het.
Hy is noodlottig in die bolyf en buik gewond.
Vyf kinders, van wie twee die slagoffer s’n, was ten tyde van die voorval in die huis. Cillie en sy dogter (14) was besig om godsdiens te hou toe hy ’n geraas in die kombuis gehoor het, het die familielid, wat verkies om anoniem te bly, gesê.
Die skietery het glo voor al vyf kinders – almal tussen 11 en 14 jaar oud – plaasgevind. Hulle is ongedeerd gelaat en ontvang tans berading.
“Hierdie was professionele mense. Alles dui daarop. Ons kan net nie verstaan dat hulle niks gevat het nie. Hulle kon die plek leeg gedra het. Ons kan dit nie glo nie,” het die bedroefde familielid bygevoeg.
Op ’n vraag oor gerugte dat die voorval moontlik ’n huurmoord was omdat Cillie glo ’n verregse groep sou wou ontmasker, het hy geantwoord: “Dit is onsin en net sensasie. Hierdie was ’n plaasmoord.”
Cillie se broer, Rossouw Cillie, het sy broer gister beskryf as iemand wat vir minderbevoorregte mense gelewe het.
“Hy het geen haat teenoor ander mense gehad nie. Hy was ’n man wat eerder gegee as ontvang het,” het hy gesê.
Die gemeenskap het reeds ’n groot bedrag ingesamel as beloning vir die inhegtenisneming van die verdagtes. Hulle is steeds op vrye voet.
Die begrafnis vind môre om 10:00 uit die NG Moedergemeente in Ceres plaas.
- Die Burger