Plaasmoorde is nie rassisties, sê minister
2010-04-23 07:03
Lizel Steenkamp, Die Burger
Kaapstad - Plaasaanvalle en plaasmoorde is nié polities gemotiveerd of rassisties van aard nie, het Nathi Mthethwa, minister van polisie, Donderdag gesê.
Mthethwa het in die parlement uitgevaar teen internasionale mediagroepe wat ná die moord op die AWB-leier, Eugène Terre’Blanche, berig het Suid-Afrika is op die rand van ’n rasse-oorlog.
“Sommige voorvalle word regtig opgeblaas en oordryf. Dis ’n mite dat daar ’n rasse-oorlog dreig. Niks kan verder van die waarheid wees nie.”
Mthethwa het só gereageer nadat ’n Finse joernalis hom gevra het hoeveel boere en plaaswerkers sedert 1994 vermoor is.
Net soos die dag ná die moord op Terre’Blanche, het die minister volgehou die polisie gaan hom nie laat insleep by politiekery en onverantwoordelike uitsprake nie. Hy het gewaarsku rolspelers moet ophou om plaasmoorde en -aanvalle in terme van ras te sien. Dit stook rasseverdeeldheid en maak boere en plaaswerkers net nog meer kwesbaar.
“Misdaad is misdaad. Dit het geen kleur of voorkeur nie. Die kwessies hou nie verband met ras of politiek nie. Dis bloot misdade teen Suid-Afrikaners en die regering moet alles doen om dit te verhoed – of dit deur ’n werker, werkgewer of vreemdeling gepleeg is, ons ondersoek dit.”
Mthethwa het ook gesê daar is geen bewyse wat die bewerings dat plaasaanvalle deesdae op ’n georganiseerde wyse deur “bendes” uitgevoer word, staaf nie.
Die ministerie het Donderdagmiddag met die vakbond Fawu, waartoe sowat 15 000 plaaswerkers behoort, oor sy landelike beveilingsplan vergader.
Volgens Katishi Masemola, hoofsekretaris, is daar sowat 450 000 permanente en 420 000 seisoenale plaaswerkers in die land. Minder as 10% van dié mense behoort tot vakbonde, deels omdat dit moeilik is om toegang tot plase te kry en om vergaderings in landelike gebiede te reël.
Die polisie, vakbonde en georganiseerde landbou gaan ’n landwye bewusmakingsveldtog voer om landelike inwoners vir die beveiligingsplan te mobiliseer.
Volgens Mthethwa sal dit die eerste keer wees dat alle rolspelers op so ’n groot skaal betrek word en gaan dit ’n reuse-verskil aan misdaadbestryding maak.