Plaasmoord – tweede man vas
2009-08-12 17:00
Johannesburg – ‘n Tweede verdagte is Woensdag in Howick in hegtenis geneem in verband met die moord op ‘n paar wie se verbrande lyke in Junie op hul plaas in Dargle, KwaZulu-Natal, gevind is.
Hy sal na verwagting eersdaags in Howick se landdroshof verskyn.
Die lyke van Alan O’Neale (57) en Hannetjie Blom (40) is in Junie op hul plaas Beverly, in Dargle, KwaZulu-Natal, gevind.
Die getroude paar is by hul huis aangeval en verwurg. Hul lyke is toe aan die brand gesteek in wat blyk ‘n wraakaanval te gewees het, het senior supt. Henry Budhram van die Suid-Afrikaanse Polisiediens gesê.
Volgens Budhram is hierdie die tweede persoon wat in verband met die saak in hegtenis geneem word.
Die eerste persoon wat vasgetrek is, is ‘n 23-jarige man wat vermoedelik die paar se tuinier was. Hy is steeds in aanhouding.
-Sapa