Plaasmoord 'is regering se skuld'
2011-02-21 08:37
Stellenbosch - “Ek lê my man se dood voor die deur van die regering. Die parlementslede verryk hulself net in plaas daarvan om beter beheer oor onwettige immigrante in te stel, of om aan armoedeverligting en werkskepping te werk.”
Só het Zelda Costa (42), die vrou van die vermoorde plaasboer Alberto Costa (44), Sondag aan Die Burger gesê in ’n eksklusiewe onderhoud op die plaas Cloetesdal, net langs Khayamandi.
Costa is Vrydag omstreeks 03:00 voor die deur van sy woonhuis doodgeskiet toe hy ondersoek gaan instel het nadat hy iets verdags buite gehoor het.
“Ek koester geen wrok teen die persoon of persone wat my man doodgeskiet het nie. Hulle het nie vir Alberto Costa kom vermoor nie; hulle ken nie eens sy naam nie. Hulle was waarskynlik hier om kos op hul tafels te sit.
“Maar ek neem die regering kwalik,” het sy gesê, kort-kort aangedaan, maar ferm.
Sowat 12 vriende het Sondag ’n vergadering op die plaas gehou om die weduwee met die praktiese reëlings van die boerdery te help.
Rudi Buys, ’n medeboer en boesemvriend van die oorledene, het gesê: “As almal wat belowe het Maandag (vandag) hier opdaag om te help pars, dan pars die res van Stellenbosch nie.”
Tiaan Strauss, voormalige Springbok-rugbyspeler en een van die Costa-familie se huisvriende, het bevestig hulle het ’n beloning van R20 000 uitgereik vir inligting wat kan lei tot die suksesvolle inhegtenisneming en skuldigbevinding van die moordenaars.
Mev. Costa self het beklemtoon die beloning is nie omdat sy vergelding wil hê nie.
“Maar as hulle nie gevang word nie, sal nog iemand dalk dieselfde smart as ons moet beleef.”
Costa word ook oorleef deur sy twee kinders, Valerio (7) en Ava (2), sowel as sy twee broers, Giovanni (59) en Stefano (61).
Volg Nuus24 op Twitter
- Die Burger