Plaasmoord-beskuldigdes vrygespreek
2011-09-28 20:07
Bloemfontein – Tien mense wat beskuldig is van ‘n plaasaanval in die Vrystaat in 2009 is Woensdag vrygespreek in die Ficksburg-streekhof.
“Die strafregtelike regstelsel het die klaers in hierdie saak gefaal,” het landdros Ollie Koekemoer in sy uitspraak, waarin hy swak werk deur die polisie gekritiseer het, gesê.
Die tien mense – agt mans en twee vroue – is vrygespreek op twee aanklagte van poging tot moord en drie aanklagte van roof met verswarende omstandighede.
Die polisie het gesê ‘n groep rowers het ‘n huishulp oorweldig en haar met ‘n geweer van haar selfoon beroof.
Hulle het toe by die plaashuis ingegaan, waar hulle ‘n gestremde vrou, Nellie Jansen van Rensburg (53), en haar 77-jarige ma gevind het.
Die vroue is met telefoonkabels vasgebind.
Volgens die polisie is die bejaarde vrou met ‘n geweer geslaan en het sy beserings aan haar bors en gesig opgedoen.
Jansen van Rensburg is met ‘n pistool in die gesig geslaan. Sy het kort ná die aanval gesterf.
Die rowers het vuurwapens en selfone gesteel voor hulle gevlug het.
In sy uitspraak het Koekemoer die polisie-ondersoek as “oppervlakkig, onakkuraat en traak-my-nie-agtig” beskryf.
Koekemoer het gesê dit sou ‘n maklike saak gewees het indien die bewyse ordentlik hanteer is. Hy het gesê die vuurwapens wat by die beskuldigdes afgeneem is, is nooit vir vingerafdruk-toetse gestuur nie.
Een van die vuurwapens, wat blykbaar aan die Jansen Van Rensburg-familie behoort het, is nie aan hulle gewys om dit óf te identifiseer óf by die polisie terug te eis nie.
“Dit is onduidelik watter pad hierdie vuurwapens gestap het,” het Koekemoer gesê.
Die hoeveelheid polisiebeamptes op die toneel in ag genome, het die ondersoek veel te wense oorgelaat, het Koekemoer gesê.
- Volg Nuus24 op Twitter
- SAPA