Plaaslike owerhede onder DA ‘vaar beter’
2010-09-29 08:47
Kaapstad - Die DA het gister die wiele aan die rol gesit vir sy veldtog vir 2011 se plaaslike verkiesings.
Die party het op ’n nuuskonferensie ’n vergelyking getref tussen die vertonings van die Gautengse Nokeng-munisipaliteit (in die Cullinan-distrik naby Pretoria) toe dit eers onder DA-beheer en later onder ANC-bewind was.
Die DA het tussen 2001 en 2006 die munisipaliteit beheer, terwyl die ANC sedert 2006 aan die be- wind was. Die munisipaliteit is in Augustus verlede jaar onder administrasie geplaas.
“Dit is belangrik dat Suid-Afrikaners al die feite op die tafel het oor hoe politieke partye in plaaslike regerings vaar,” het James Lorimer, DA-woordvoerder, gister gesê.
Volgens hom het die inwoners van Nokeng werklike dienslewering, ontwikkeling en gesonde plaaslike regeringspraktyke ervaar toe die DA daar aan die bewind was.
“In teenstelling daarmee is die munisipaliteit tans in ’n krisis en word die huidige ANC-regering gekenmerk deur besteding aan luukshede,” het hy gesê.
Die DA gaan in die maande tot voor volgende jaar se plaaslike verkiesings in Mei munisipaliteite landwyd besoek om soortgelyke voorbeelde te vind.
Lorimer het gesê hy hoop dié onthullings sal lei tot meer stem- me vir die DA in volgende jaar se verkiesings. “Kiesers blyk keelvol te wees,” het hy gesê.
Hy het toegegee dat die meer- derheid kiesers in die verlede vir die ANC gestem het, nie om- dat hulle glo die ANC sorg vir beter dienslewering nie, maar omdat dit ’n “identiteitstem” is.
- Die Burger