Pitso wil sokker na wit skole bring
2010-09-02 10:01
Johannesburg – Pitso Mosimane, afrigter van Bafana Bafana, sal op sy gelukkigste wees as sy telefoon aanhoudend lui met oproepe van skoolhoofde wat sokker wil aanbied.
Mosimane het gister by die Hoërskool Randburg in die noordweste van Johannesburg gesê hy wil graag hê skole wat nie voorheen sokker aangebied het nie, moet nou dié sport ’n kans gee.
“Daar is nie baie sokker by wit skole nie. Ek sien dit as my taak om sokker daar bekend te stel. Ek wil hê my telefoon moet aanhou lui soos mense bel wat sokker by skole wil aanbied,” het hy gesê.
“Daar is kinders wat nie wil rugby speel of dalk nie van krieket hou nie. Hulle kan sokker speel.”
Bafana het by die skool geoefen vir sy stryd teen Niger, wat Saterdag in die Mbombela-stadion in Nelspruit plaasvind. Dit is die span se eerste kwalifiserende wedstryd vir 2012 se Afrikabeker-toernooi.
Opgewonde leerlinge van die hoërskool, waar Brasilië tydens WB 2010 geoefen het, het die Bafana-span met luide applous verwelkom.
Veral Siphiwe Tshabalala, Bafana se WB 2010-held, is toegejuig. Leerlinge het die spelers behoorlik bestorm om handtekeninge te kry.
Die skool bied nie sokker as sport aan nie, maar Mosimane het hulle aangemoedig om dit te speel.
“Ek weet julle het wedstryde tydens die Wêreldbeker gekyk, want julle ken jul gunstelinge.
“Sokker moet hier bly. Ek sal julle ’n afrigter gee. Ek wil die meisies ook ’n bal sien skop. Ek hoop ons kry spelers van hierdie skool wat vir Bafana kan uitdraf.”
Volgens Mosimane het onderwysers aan hom gesê meer as 80 leerlinge in die skool wil sokker speel. “Dis ongelooflik. Ek het gedink daar sal net drie of vier wees,” het hy gesê.
Ironita Peters (18) was uit haar vel omdat sy haar helde in lewende lywe gesien het.
“Ek voel sommer trots Suid-Afrikaans. Ek weet hulle gaan Saterdag wen, want hulle het so mooi tydens die Wêreldbeker gespeel,” het sy gesê.
Volg Beeld op Twitter.
- Beeld