Pistorius se regspan na-ure toegelaat
2013-02-18 14:41
Pretoria – Die regspan van die moordbeskuldigde Paralimpiese atleet Oscar Pistorius word steeds ná die vasgestelde besoektye by hom toegelaat, het Kenny Oldwage, sy prokureur, Maandag gesê.
"Ons het te alle tye toegang tot hom," het Oldwage in 'n telefoniese onderhoud gesê.
Die besoektye by die plaaslike polisiekantoor, waar Pistorius sedert Vrydag aangehou word, is 15:00 tot 16:00. Oldwage het egter gesê die regsspan het Pistorius buite die vasgestelde tye gesien vir konsultasie.
Verskeie joernaliste het Maandag buite die polisiekantoor gewag. Sowat 20 plaaslike en internasionale joernaliste het probeer om Pistorius se vriende en familie te sien voor Dinsdag se borgtogaansoek by die Pretoriase landdroshof.
Die Amerikaanse TV-kanaal NBC het sy toerusting oornag oorkant die gebou gestoor en 'n sekuriteitswag aangestel om daarna te kyk.
Alex Crawford, 'n joernalis van
Sky News, het gesê die nuus van Pistorius se inhegtenisneming is wyd berig in Brittanje.
"Hy is omtrent die enigste buitelandse Olimpiese atleet wat die Britte ken, behalwe Usain Bolt. Hulle is baie geskok."
Die 26-jarige Pistorius word daarvan aangekla dat hy sy 29-jarige vriendin, Reeva Steenkamp, verlede Donderdag by sy huis in die ooste van Pretoria doodgeskiet het. Hy is intussen aangekla van moord en sal na verwagting Dinsdag 'n formele borgtogaansoek voor die hof bring.
Steenkamp se familie het Sondag gesê haar oorskot het in Port Elizabeth aangekom. 'n Privaat begrafnisdiens sal Dinsdag gehou word.
– Volg Nuus24 op
Twitter
- SAPA
