Pistorius 'kry nie voorkeurbehandeling'

2013-02-15 17:38

Pretoria – Die nasionale vervolgingsgesag (NVG) het benadruk dat Oscar Pistorius geen spesiale behandeling agter tralies sal kry nie.

Die wêreldberoemde atleet sal nie die naweek in ‘n korrektiewe dienste-tronk deurbring nie, maar sal by ‘n polisiestasie aangehou word.

“Ons glo dis regverdig vir die beskuldigde sodat hy met sy verdediging kan vergader. Wanneer die beskuldigde in ‘n tronk aangehou word, kan hy nie na-ure besoek word nie...” het Medupe Simasiku, ‘n woordvoerder van die NVG, gesê.

“Daar is geen status vir bekendes hier nie.”

Pistorius is vroeër amptelik van die moord op sy vriendin – Reeva Steenkamp – aangekla. Sy is in die atleet se huis in Silver Lakes, Pretoria, doodgeskiet.

Hy sal volgende week weer in die hof verskyn om aansoek om borgtog te doen.

Volg Nuus24 op Twitter