Pistorius eis R2,2 m. van vrou ná arres
2011-02-09 10:03
Johannesburg – Die lemnaeler Oscar Pistorius eis R2,2 miljoen van ’n student omdat sy glo kwaadwillig ’n klag van aanranding teen hom ingedien het.
Pistorius sê in stukke in die hooggeregshof in Pretoria hy het skade van R2 218 988 gely weens Cassidy Taylor-Memmory se optrede.
Volgens hom is twee openbare geleenthede weens sy arrestasie en aanhouding afgestel.
Twee instellings het ook geweier om hul “handelsmerk- ambassadeur”-ooreenkomste met hom te hernu. Dít het hom ’n verlies aan inkomste besorg.
Taylor-Memmory, van Silver Lakes in die ooste van Pretoria, wou Dinsdag ’n aansoek by die hof indien dat Pistorius sekere dokumente aan haar beskikbaar laat stel voordat sy haar pleitstukke in die saak laat opstel. Die saak is toe by ooreenkoms tussen die partye onbepaald uitgestel.
Pistorius se regsverteenwoordigers moet vir dié aansoek van Taylor-Memmory teen 1 Maart hofstukke opstel.
Pistorius, ook van Silver Lakes, sê in sy eisbesonderhede Taylor-Memmory het op 12 September 2009 by die Boschkop- polisiekantoor kwaadwillig ’n vals klag van aanranding met die opset om ernstig te beseer ingedien. Sy het aan die polisie gesê hy het haar dié dag by sy huis aangerand.
Volgens Pistorius het Taylor-Memmory beweer hy het die huis se houtdeur toegeslaan sodat dit gebreek en ’n stuk hout haar teen die been getref het.
Daarna het sy bykomende verklarings aan die polisie gedoen.
Sy het gesê hy het die deur met sy vuis geslaan sodat dit gebreek het.
Sy het later beweer hy het die deur met die oop hand geslaan sodat dit gebreek het.
Pistorius sê Taylor-Memmory het geweet die inligting aan die polisie is vals. Sy het geweet haar eie skoppery het die deur laat breek en dat ’n stuk hout haar toe teen die been getref het.
Weens haar klag is hy gearresteer en op 13 September 2009 vrygelaat.
Volgens Pistorius het hy weens die klag, arrestasie en aanhouding bedreig, vernederd, bang en kwesbaar gevoel. Hy is verkeerdelik van sy vryheid ontneem. Hy is nie vervolg nie.
Volg Nuus24 op Twitter
- Beeld