Piet Byl sou Oscar-saak wou ondersoek
2013-02-22 09:27
Pretoria – Die oudspeurder Piet Byleveld sou graag die ondersoekbeampte in die moordsaak teen Oscar Pistorius wou wees, berig Beeld.
“In die lig van die omstandighede sou ek minstens twee volle dae op die toneel spandeer het,” het hy Donderdag by navraag gesê ná aantygings deur Pistorius se regspan dat die “swak gehalte” van die polisie se werk die integriteit van die ondersoek onder verdenking plaas.
Adv. Barry Roux SC, Pistorius se regsverteenwoordiger, het in die hof gesê nadat die polisie se ballistiese deskundiges klaar Pistorius se huis op die Silver Woods-landgoed gefynkam het, het sy onafhanklike span deskundiges ’n koeëlpunt in die toiletbak gekry wat deur die polisie misgekyk is.
Ao. Hilton Botha, ondersoekbeampte wat intussen vervang is, is ook gekritiseer dat hy sonder skoenbedekkings in Pistorius se huis ingeloop het.
Byleveld het gesê ’n misdaadtoneel word beslis versteur as die speurder in beheer nie volledig toegerus is om die toneel te ondersoek nie.
“Ek sou nie eens die kommissaris daar toegelaat het voordat ek tevrede was dat my ondersoek klaar is nie. ’n Dag sou te kort gewees het om my van al die feite te vergewis en behoorlik voor te berei.
“Onthou, ’n ou se geloofwaardigheid word selfs in die borg(tog)aansoek getoets.
“Die verdediging probeer soveel gate moontlik kry.”
Byleveld het gesê hy het self in sy sake die lykskouings bygewoon.
“Kyk, baie ouens hou nie daarvan nie, maar dit was vir my belangrik.”
– Volg Nuus24 op Twitter
