Phosa tree in bres vir Malema
2012-01-15 07:00
Johannesburg – Julius Malema het aan die vooraand van ’n week waarin sy politieke loopbaan beëindig kan word ’n belangrike bondgenoot gevind.
Mathews Phosa, tesourier-generaal van die ANC, het Saterdagmiddag by die eeufeesvieringe van die ANC in Limpopo by die Matlelerekeng-sportterrein in die Sekhukhune-distrik, vir Malema en die provinsie se premier opgekom.
Phosa het aangevoer die nasionale regering het Cassel Mathale se “mag gesteel” deur onlangs vyf provinsiale departemente onder administrasie te plaas.
Mathale en Malema is bondgenote in die stryd om pres. Jacob Zuma by die ANC se leiersverkiesing in Desember in Mangaung te ontsetel.
Duisende mense het Malema, Phosa en Mathale in die bloedige hitte luidkeels toegejuig.
Phosa het tydens sy spreekbeurt gesê “dit is waar dat ons nie die rol van die jeug in die struggle kan wegwens nie”.
“Dit is ook net die takke van die ANC wat in Desember kan besluit wie die nuwe leierskorps van die ANC word en nié mense in raadsale nie,” het Phosa bygevoeg.
“Ons as nasionale leiers moet ook nie bang wees vir idees waarmee ons nie saamstem nie. Ons moenie diegene wat van ons verskil se monde snoer nie.”
Hy het voor die skare aan Malema gesê hy weet “Juju is baie bekommerd” oor wat die appèlkomitee binne die volgende dae gaan besluit oor sy skorsing van vyf jaar uit die ANC.
“Maar ek wil hom verseker die ANC het nie asblikke waarin kamerade weggegooi word nie. As kamerade foute maak, vind ons meganismes om dit reg te stel. Ons doen dit ook net ás hulle foute begaan het.”
Aan Mathale het Phosa gesê die ANC se nasionale uitvoerende komitee (NUK) aanvaar sy onlangse herverkiesing as ANC-voorsitter in Limpopo.
Malema het gesê: “Die ANC in Limpopo is nie bang vir die jeug nie.”
Dit was ’n indirekte verwysing na die eeufeesvieringe van die ANC in Bloemfontein verlede Sondag waar Malema nie ’n spreekbeurt gegun is nie.
“Leiers van die ANC moenie bang wees vir hul jeug nie. As jy die jeugliga vernietig, vernietig jy die ANC,” het Malema gesê.
Rapport se susterkoerant, City Press, berig Malema het die afgelope week onder skoot gekom vanuit eie geledere omdat hy “vlerksleep” by oudpres. Thabo Mbeki.
Volgens bronne in die jeugliga se NUK het Malema nie die res van die leierskorps se steun gehad om ’n vergadering met Mbeki aan te vra nie.
– Volg Nuus24 op Twitter
- Rapport