Phiyega se aanstelling bevraagteken
2012-07-23 22:49
Johannesburg – Vrae het aan die lig gekom oor die aanstelling van die nuwe nasionale polisiekommissaris, genl. Riah Phiyega, het die DA Maandag gesê.
Ten spyte daarvan dat pres. [Jacob] Zuma haar lof besing het toe hy haar aanstelling aangekondig het, het daar nou verskeie vrae aan die lig gekom rakende haar indiensneming-geskiedenis en verskeie sakebelange,” het Dianne Kohler-Barnard, DA-LP, in ‘n verklaring gesê.
“Genl. Phiyega het op twee geleenthede nie botsende belange waarvan ons bewus is – XON en nou Lefatshe – verklaar nie.
Volgens ‘n verslag wat Maandag uitgereik is, het Phiyega uit haar pos as direkteur van Lefatshe Technologies bedank en ‘n paar dae later het sy ‘n ondersoek oor korrupsie en bedrog in die maatskappy gelei.
Phiyaga was ‘n paar dae voordat die ondersoeke begin het glo steeds gelys as ‘n direkteur van die kommissie vir maatskappye en intellektuele eiendom (Cipc).
Kohler-Barnard sê dit is duidelik botsende belange wat nie bekendgemaak is in haar curriculum vitae nie. Haar CV is aan die parlementêre portefeuljekomitee oor polisie ingehandig.
Phiyega het glo ook onder skoot gekom nadat dit aan die lig gekom het dat sy bande het met ‘n maatskappy wat die Suid-Afrikaanse Polisiediens (SAPD) van inligtingstegnologie-toerusting voorsien het.
Sy was ‘n direkteur en aandeelhouer in Kapela Capital wat ‘n 40% aandeel in XON het. Dié maatskappy het glo inligtingstegnologie-kontrakte met die SAPD.
“Haar verskoning in die geval van XON was dat sy nie meer in die pos was toe dit ‘n botsende belang geword het nie. Sy gebruik hierdie keer die verskoning dat sy ‘n ‘nie-uitvoerende lid’ is en nooit enige aandeelhouding gehad het nie,” het Kohler-Barnard gesê.
“Al hierdie inligting is gerieflik uit die CV gelaat wat by die portefeuljekomitee ingedien is... Ons moet nou bevraagteken of die parlement met opset mislei is in die aanstellingsproses.”
Kohler-Barnard sê sy sal aan Zuma skryf en hom inlig van die botsende belange en vra vir ‘n verduideliking oor hoe daar op haar aanstelling besluit is.
Zuma se woordvoerder, Mac Maharaj, het Maandag gesê hy kan nie kommentaar lewer oor die kwessie nie.
Hy sê die presidensie sal wag vir ‘n brief van die DA voordat hy enige kommentaar lewer.
– Volg Nuus24 op Twitter
- SAPA
