Phiyega bekommerd oor polisiemoorde

2013-01-09 16:22

Johannesburg – Polisiekommissaris Riah Phiyega het Woensdag haar kommer uitgespreek oor moorde op polisielede nadat nóg ‘n beampte tydens ‘n rooftog doodgeskiet is.

“Hy is die eerste slagoffer in die SAPD... in 2013,” het sy in ‘n verklaring gesê.

Sy het gesê die besit van onwettige vuurwapens dra by tot polisiemoorde.

Phiyega het gemeenskappe aangemoedig om op hul hoede te wees en om aan te hou om die polisie van inligting te voorsien wat hulle kan help om onwettige vuurwapens te vind.

Sers. Molahlehi Ephraim Mokhasi (41) is Dinsdag tydens ‘n rooftog in Kopanong dood.

Vier gewapende mans het kort voor 14:00 ‘n winkel beroof. Die polisie het opgedaag terwyl hulle probeer vlug het en die rowers het gevolglik weer by die winkel ingehardloop.

Hulle het ‘n ruk later weer uitgehardloop en skote afgevuur. Die sersant is geskiet en is op die toneel dood.

Die rowers het met kontant, ‘n skootrekenaar en ‘n polisie-dienspistool op die vlug geslaan.

Die polisie het die rowers weer ná twee kilometer voorgekeer.

‘n Vroulike konstabel van die Bloemfonteinse honde-eenheid is in die been en hand gewond. ‘n Derde koeël het haar koeëlvaste baadjie getref.

‘n Ander polisiebeampte is in die hand geskiet.

Een van die gewapende rowers is doodgeskiet en ‘n ander een is in hegtenis geneem. ‘n Ander rower is Woensdag in hegtenis geneem.

Die twee, wat onderskeidelik 28 en 19 jaar oud is, sal Donderdag in die Bloemfontein-landdroshof verskyn op aanklagte van moord, poging tot moord en gewapende roof.

– Volg Nuus24 op Twitter
 

- SAPA