Phillips wóú sy vrou vermoor
2009-08-27 16:18
Pretoria - ‘n Man van Pretoria het beplan om sy vrou te vermoor en haar doelbewus met ‘n mes doodgesteek, het die hooggeregshof in Pretoria Donderdag gesê.
Regter André Louw het vir Larry Burt Phillips (50) skuldig bevind op die moord van sy vrou Henriëtte (48).
Phillips het sy vrou in November verlede jaar naby die egpaar se woonstelblok in Lynnwood in Pretoria met ‘n mes in die rug gesteek.
Phillips is ook skuldig gevind op aanklagtes van die aanranding van sy vrou voor haar moord, die ontvoering van die egpaar se seun en vir die aanranding van ‘n buurman, Pieter Korb.
Die hof het Phillips se argument dat hy sonder 'n wapen by sy vrou se woonstel ingebreek het en dat sy vrou twee messe vanuit die kombuis geneem het om hom eerste aan te val, verwerp.
Vroeër het Phillips se dogter, Leigh, en sy seun, Howard, getuig dat hy gedreig het om die hele gesin uit te moor, voor hy sy vrou doodgemaak het.
Leigh het ook getuig dat haar ma die aand van die moord nooit na die kombuis toe is nie, maar direk na haar kamer gegaan het, waar Phillips haar ingewag het.
Die hof het beslis dat Phillips die mes reeds by hom gehad het terwyl hy vir omtrent 'n halfuur lank gesit en wag het met die doel om haar te vermoor.
Die rusie tussen die egpaar het gegaan oor 'n beskermingsbevel wat Henriëtte vroeër teen haar man gekry het. Hy wou glo hê sy moes dit terugtrek sodat hy 'n werksontrak kon losslaan.
- Sapa