Petrolbom na huis geslinger
2012-09-12 17:56
Johannesburg – ‘n Petrolbom is na 'n huis in die John Taolo Gaetsewe-distrik in die Noord-Kaap gegooi, het die polisie gesê.
“Hulle het ‘n bom na die huis gegooi, maar het gelukkig gemis. Die huis het nie gebrand nie,” het lt. Andrea Cloete gesê.
“Die eienaar van die huis het ‘n saak van kwaadwillige saakbeskadiging aanhangig gemaak.”
Panyaza Lesufi, woordvoerder van die departement van basiese onderwys, sê die huis behoort aan die ouers van ‘n leerder in die distrik.
“Die departement glo dat die aanval op die huis se doel is om leerders te intimideer en hulle te verhoed om deel te neem aan ekstra klasse in die distrik,” het Lesufi, gesê.
Altesaam 41 van 65 skole in die John Taolo Gaetsewe- munisipale gebied is sedert Junie as gevolg van intimidasie gesluit.
Inwoners van die distrik betoog ook oor ‘n gebrek aan teerpaaie.
‘n Verslag van 18 bladsye oor die situasie wat deur ‘n onderwys-taakspan saamgestel is, is verlede Maandag aan Angie Motshekga, minister van basiese onderwys, oorhandig.
Patricia de Lille, die burgermeester van Kaapstad, sê drie skole in die gebied is al afgebrand en honderde leerders is na ‘n kamp geskuif waar daar skoolgehou word.
Lesufi het die voorval en die intimidering van die leerders sterk veroordeel.
“Die departement gaan voort met sy pogings om leerders en onderwysers in die distrik by te staan,” het Lesufi gesê.
– Volg Nuus24 op Twitter
- SAPA
