Pelgrimsrus-aansoek 'dringend', sê regter

2012-07-25 14:13

Pretoria – Die Pretoriase hooggeregshof het beslis dat die sakelui van Pelgrimsrus se aansoek om 'n interdik teen hul uitsetting, inderdaad dringend is.

'n Groep sakelui van Pelgrimsrus het Dinsdag 'n dringende aansoek by die Pretoriase hooggeregshof ingedien om hul uitsetting te verhoed. Regter Stanley Makgoba het Woensdag gesê die aansoek teen Dikeledi Mahlangu, provinsiale minister van openbare werke, word dringend geag.

Dít volg nadat die departement van openbare werke, paaie en vervoer in Mpumalanga uitsettingsbevele op die ondernemings bedien het en hulle 31 dae kans gegee het om hul deure te sluit. Die sake-eienaars is ook in kennis gestel dat hul huurkontrakte nie hernu sal word nie.

Sommige eienaars het gesê hulle het geen reaksie van die departement ontvang oor hul aansoeke vir huurkontrakte nie.

Sake-eienaars huur die eiendomme by die departement wat die historiese myndorp besit en bestuur.

Ná Makgoba se beslissing oor die dringendheid van die saak, het die hof argumente van regsverteenwoordigers van die applikante en respondente aangehoor.

– Volg Nuus24 op Twitter

- SAPA