Pedofiel uit op borgtog
2011-05-17 22:01
Johannesburg - Die veroordeelde pedofiel Ian Appleton is Dinsdag op R20 000 borgtog vrygelaat, hangende die uitslag van sy appèl aan die Wes-Kaapse Hooggeregshof teen sy gevangenisstraf van vyf jaar.
Hy is dié straf opgelê nadat hy daarvan skuldig bevind is dat hy ‘n sewejarige seun verkrag het.
Die 72-jarige rekenmeester en afgetrede skoolhoof het in die Paarlse Distrikshof verskyn.
Die hofsaal was volgepak, met lede van anti-kindermishandeling-organisasies en die ouers van die slagoffer wat teenwoordig was.
Landdros Norma Smile het verlede maand, toe Appleton skuldig bevind is, sy borgtog van R1 000 na R10 000 verhoog, maar dié bedrag Dinsdag tot R20 000 verdubbel.
Sy het die R1 000-borgtog wat deur die landdroshof toegestaan is, as “pateties” beskryf.
Dié borgtog het verlede maand met Appleton se skuldigbevinding verstryk. Sy regsverteenwoordiger, John Riley, moes ‘n tweede aansoek, hangende die uitslag van Appleton se appèl, van stapel stuur.
Lede van die anti-kindermishandeling-groepe het geluister hoe Rialda Jacobs, aanklaer, die tweede aansoek teengestaan het.
Lede van die gehoor het na hul asem gesnak toe Smile beslis het daar is omstandighede wat Appleton se vrylating op borgtog regverdig.
Woedende mense het by die hofsaal uitgestorm. ‘n Polisiebeampte moes orde herstel.
Riley het in ‘n stadium gekla en die gedrag van die gehoor “aanstootlik” genoem.
Smile het gesê sy verstaan die gevoelens van die gemeenskap en die publiek in die hof, maar dat sy objektief in haar beslissing moet wees.
Toe die aanklaer gesê het Appleton kan veel meer as R10 000 bekostig, het die landdros gesê: “As R10 000 vir hom niks beteken nie, moet die bedrag verhoog word.”
Smile het gesê die bedrag moet verhoog word “om te verseker dat Appleton nie sal probeer vlug nie”.
Appleton sal, as borgtogvoorwaarde, onder streng huisarres wees. Hy sal slegs sy huis in Seepunt mag verlaat om kerk by te woon of mediese sorg te kry.
Hy mag nie eens inkopies gaan doen nie en sal iemand anders moet kry om dit vir hom te doen, het Smile gewaarsku.
- Volg Nuus24 op Twitter
- SAPA