Pedofiel-sakeman se vonnisoplegging hervat
2013-01-24 07:16
Kaapstad – Johannes Kleinhans, wat teregstaan op 'n rits seksmisdade, se vonnisoplegging sal na verwagting Donderdag in die Parow-streekhof voortduur.
Die 74-jarige direkteur van verskeie maatskappye is skuldig bevind op 95 aanklagte, insluitend aanranding en die besit van kinderpornografie.
Vonnisverrigtinge is verlede jaar uitgestel omdat Kleinhans se prokureur, Johannes Grobbelaar, die staatspsigiater se verslag wou bestudeer en dit met sy kliënt wou bespreek.
Die verdediging het ook 'n tweede opinie gesoek.
Dr. Marcel Londt, 'n maatskaplike werker wat betrokke is in die behandeling van seksoortreders, het Woensdag aan die hof gesê daar is nie 'n kitsbehandeling vir pedofilie nie.
Londt, wat vir die verdediging in die verhoor getuig het, het gesê Kleinhans se probleem is "nie iets wat oornag aangespreek kan word nie", en dat langtermyn-gevangenisstraf nie gunstig is vir doeltreffende behandeling nie.
Sy het aan die hof gesê Kleinhans se tydperk van aanhouding terwyl hy verhoorafwagtend was, het reeds die afskrikmiddel-aspek van die behandeling aangespreek.
Volgens haar is die tronk nie die beste omgewing om die ander aspekte te takel nie.
"Om dit baie moeilik vir hom te maak om weer 'n oortreding te begaan, moet ons sy behandeling streng beheer. Die effektiewe bestuur van sy behandeling sal ook sy familie insluit."
Londt is die hoof van die CATTS-rehabilitasieprogram.
Toe sy deur Herculine Swart, staatsaanklaer, ondervra is, het Londt gesê die CATTS-program duur 36 maande en verskaf nie 24-uur-toesig nie.
Londt het gesê die CATTS-program is nie "breë terapie" nie en benodig baie streng beheer, wat weens personeeltekorte onmoontlik is om in die tronk te bestuur.
– Volg Nuus24 op Twitter
- SAPA
