Pastoriemoord: VF+ wys vinger na regering
2012-11-09 07:00
Johannesburg – Die regering is deels verantwoordelik vir die moord op 'n predikant en sy aanstaande skoonseun in Harrismith in die Vrystaat, het die Vryheidsfront Plus Vrydag gesê.
"Dié moorde en baie ander soortgelyke moorde wys die vinger na 'n regering wat nie meer die vermoë het om sy burgers te beskerm nie," het die VF+ se leier in die Vrystaat, Abrie Oosthuizen, in 'n verklaring gesê.
Die 60-jarige ds. Willem Brits van die NG Kerk Kerkenberg en sy gesin is Donderdagaand deur drie verdagtes in hul huis oorval.
Brits se aanstaande skoonseun, die 25-jarige Gerhardus Vermeulen, is in sy kop geskiet en het op die toneel beswyk.
Die dominee het Vrydagoggend in die hospitaal gesterf. Sy vrou, Dorethia, is steeds in die hospitaal met erge kopbeserings nadat sy met 'n byl aangeval is.
Een van die verdagtes is vasgetrek waar hy in bebloede klere langs die N3 gestap het.
Vyf selfone en 'n vuurwapen is in sy besit gevind.
Oosthuizen het gesê internasionale organisasies soos die Verenigde Nasies (VN) moet kennis neem van die "onaanvaarbare situasie" in Suid-Afrika.
"Die situasie in Suid-Afrika benodig nou internasionale ingryping. Selfs sanksies teen die land kan geregverdig word om sodoende die Suid-Afrikaanse regering verantwoordelik te hou."
Oosthuizen het bygevoeg dat 'n "oorbelaste" land soos Suid-Afrika kan bekostig om sy burgers van beter sekuriteit te voorsien.
Volg Nuus24 op Twitter.
- SAPA
