Pastoriemoord: Broers en suster is kwaad
2012-11-15 15:31
Harrismith – Die sibbe van Martin Brits, wat amptelik skuld beken het op die moord op ds. Willem Brits, is kwaad vir hom, het 'n familiewoordvoerder aan OFM gesê.
AJ Scherrer, 'n familiewoordvoerder, sê sy broers, Dawid en Willie, en suster Thea, sukkel om die jongste verwikkelinge te verwerk.
"Ek het juis vanoggend [Donderdag] met hulle gepraat. Hulle is kwaad, maar hulle is ook bereid om as gelowiges vergifnis te gee en daarom sal hulle ook vir hom in die proses hul ondersteuning gee – as familie, as gesin."
Scherrer sê Dawid, Willie en Thea het Martin nog nie na die voorval gesien nie, maar reëlings word getref sodat hulle hom binnekort kan besoek. Hy word in die Harrismith-gevangenis aangehou.
Martin Brits (28) en sy medebeskuldigde, Elliot Mhlambi (41), word daarvan aangekla dat hulle Willem (60) en sy aanstaande skoonseun, Gerhard Vermeulen (25), vermoor het. Hulle het Maandag in die hof verskyn en hul volgende hofverskyning is op 19 November.
Willem se vrou, Dorothea, is steeds in 'n kritieke toestand in Mediclinic Bloemfontein nadat sy in die voorval met ‘n byl aangeval is.
Intussen word Vermeulen se roudiens Donderdag om 15:00 gehou en Willem s'n Vrydag om 11:00.
– Volg Nuus24 op Twitter
