Pastoor vermoor glo eie seun
2011-10-12 12:00
Johannesburg – ‘n Oos-Kaapse pastoor is onder polisiebewaking in ‘n hospitaal nadat hy na bewering sy tweejarige seun in Kwazakhele, naby Port Elizabeth, vermoor het, het Herald Online Woensdag berig.
Luidens die webtuiste het die 29-jarige pastoor ook probeer om homself om die lewe te bring.
Die pastoor het glo sy seun keelaf gesny en probeer om sy eie keel te sny nadat hy Dinsdagoggend ‘n argument met sy vrou gehad het.
Volgens die polisie het die man sy vrou met ‘n mes gedreig voordat hy homself en die seun in ‘n slaapkamer toegesluit het.
Insp. Dumile Gwavu het aan The Herald gesê bure het die kamer se deur afgeskop.
“Die klein seun was reeds dood en die man het oor die lyk gestaan en gebid en gepreek voordat hy sy eie keel gesny het,” het Gwavu vertel.
Volgens die egpaar se bure was hulle "stil en respekvolle" mense.
“Ek het nie veel van hulle geweet nie, behalwe dat die man ‘n prediker is en sy vrou nie werk nie. Ons sou mekaar net groet. Hy [die seun] het dit geniet om saam met my sesjarige seun in die tuin te speel,” het Buyiselwa Gwangqana, ‘n buurvrou, gesê.
Gwavu sê die man sal in ‘n hof verskyn nadat hy herstel het.
Volg Nuus24 op Twitter
- SAPA