Pastoor se 'visioen' ingespan in soektog na meisies
2011-08-03 09:22
Upington – Aanwysings van ’n pastoor wat sê sy het in ’n visioen gesien waar in die rivier die twee meisies is wat Maandagoggend van die voetgangerbrug oor die Oranjerivier gespring het, is gister deur die polisie gebruik in die onverpoosde soektog na die meisies.
Polisieduikers het teen gistermiddag laat, toe die son reeds lang silwer strepe oor die rivier gegooi het, nog na Ashley Andrews (15) en Lizette Dryer (16) gesoek. ’n Polisiehond is ook in die soektog ingespan.
Nadat daar die grootste gedeelte van die dag naby die oewer aan die dorp se kant van die rivier gesoek is – waar die rivier dieper is – is gistermiddag aan die anderkant volgens past. Sharon Saunderson van die Moria-bediening se aanwysings gesoek.
Ansie Andrews, Ashley se ma, het die hele middag langs die rivier die soektog dopgehou.
“Dis die hoekoms en die waaroms. Ek en Ashley was tjommies. Ons het altyd oor alles gepraat,” het sy aan Volksblad gesê.
Sy sê Ashley het Vrydagaand gebel om te sê sy gaan vir die naweek by die Dryers kuier. Sondag het sy ’n SMS gestuur om te sê sy sal omstreeks 15:00 by die huis wees.
“Sondagaand het ek haar gebel om te vra wanneer sy dan terugkom. Sy het gesê sy is te ver. Maandag het ek, voordat ek werk toe is, nog ’n briefie vir haar gelos om te vra sy moet deeg knie. Hulle het by die werk kom sê wat gebeur het.”
Saunderson het aan Volksblad gesê sy het Maandagaand tot die Here gebid om vir haar ’n visioen te stuur oor waar die meisies is.
Gisteroggend het sy ’n beeld gekry van waar die meisies ’n ent van mekaar op die bodem van die rivier lê. ’n Lid van die polisie wat sy ken, het haar gistermiddag na die toneel gebring nadat sy aanvanklik nie wou kom nie.
“Ek ly aan stres en was bang om te sien as hulle die kinders kry.”
Sy het aanwysings aan kapt. Gert Nel van die polisie op Upington se duikeenheid en kapt. Charles Hayes gegee.
Die duikers het daarna in die omgewing wat sy aangedui het, na die meisies gesoek.
’n Polisiehond is ook in dié deel van die soektog gebruik.
Saunderson sê sy het al by verskeie geleenthede mense ná visioene opgespoor. ’n Tyd gelede is kinders wat in die rivier verdrink het, ook opgespoor nadat haar aanwysings die polisie direk na hulle gelei het.
“Dit is ’n gawe wat ek het.”
Familielede en verskeie nuuskieriges het die soektog van die wal af dopgehou.
Teen druktyd kon geen beduidenis van die meisies nog gekry word nie. Die soektog word vandag voortgesit.
– Volg Nuus24 op Twitter.
- Volksblad