Pastoor se seun kry lewenslank
2010-12-09 09:15
Volksblad
Welkom – Die seun van ’n pastoor is hier in die streekhof lewenslank tronk toe gestuur ná die wrede verkragting en moord op ’n skoolmeisie van Thabong.
Sello Morabe (21) is deur die polisie vasgetrek nadat woedende inwoners gedreig het om sy pa se huis aan die brand te steek terwyl hy in die hospitaal behandel is vir ’n wond aan sy penis waar die erg beseerde slagoffer hom oomblikke voor haar wurgdood gebyt het.
Morabe is met oorweldigende sterk forensiese getuienis met die verkragting en moord verbind en het voor landdros T. Ramdeyal skuld op albei aanklagte beken.
Die voorval was op 24 April toe hy saam met die 18-jarige skoolmeisie en haar vriendinne by ’n nagwaak was wat deur sy pa in die woonbuurt Thabong gehou is. Hulle is saam daar weg en toe hy later met die slagoffer alleen wou praat, is haar vriendinne daar weg omdat hulle hom goed geken het en nie getwyfel het dat sy veilig sou wees nie.
Hy het daarop aangedring dat die meisie met hom seks moet hê, maar sy het geweier. Hy het haar met ’n mes gesteek totdat die lem gebreek het, en haar toe verkrag. Hoewel sy erg beseer was, het hy daarna daarop aangedring dat sy orale seks met hom moet hê. Sy het hom gebyt, waarna hy haar verwurg het.
Hy het haar lyk aan die buitewyke van die woonbuurt in die veld gelos.
Toe haar verdwyning rugbaar word, het die gemeenskap ontdek dat sy laaste in Sello se geselskap was en het na die pastoor se huis opgeruk en gedreig om dit af te brand.
Sello, wat bang was dat die polisie hom by die hospitaal in Welkom sou soek, is vir behandeling na die hospitaal op Odendaalsrus.
Sy pa het intussen die woedende skare gekalmeer en onderneem om die polisie te bel sodra sy seun tuiskom, wat hy toe gedoen het.
Die openbare galery van die hofsaal van die hof vir seksuele misdrywe was vir die twee dae van die verhoor stampvol.
Ramdeyal het die twee aanklagte vir vonnisdoeleindes saamgevoeg en Sello lewenslank tronk toe gestuur.
Abraham Xaba het aangekla.
Volg Nuus24 op Twitter.
- Volksblad