Pastoor erken hy het met seuns gelol
2010-06-24 07:38
Vicüs Bürger, Volksblad
Vrystaat - ’n Pastoor op Wepener in die suidoos-Vrystaat het Woensdag in die streekho skuld beken op twee aanklagte van seksuele aanranding waarby tienerseuns betrokke was.
Pastoor Johan Meiring (32) van die Touch Me Lord-bediening op dié dorp het Woensdag voor streeklanddros R. Matthews verskyn. Die pastoor wat oënskynlik gespanne was in die beskuldigdebank, is tot altesaam 60 maande tronkstraf gevonnis wat in geheel vir vyf jaar opgeskort is.
Meiring het aan die geslagsdele van seuns van 18 en 16 jaar in onderskeidelik September verlede jaar en November 2008 gevat terwyl hulle geslaap het.
Hy sê in sy pleitverduideliking wat deur sy regsverteenwoordiger, Martin Scheepers van Honey-prokureurs in Bloemfontein, voorgelees is, dat die voorvalle by sy blyplek op Wepener in die aand ná ’n kuiery plaasgevind het.
Drank was by die voorvalle betrokke.
Volgens die aanklaer, Johann Loubser, was die pastoor in ’n vertrouensverhouding met die seuns wat hy misbruik het.
Meiring het getuig dat hy in sy kinderjare die slagoffer van gesinsgeweld was wat gelei het tot die dade wat hy met die seuns gepleeg het.
Hy ondergaan reeds meer as twee maande lank berading.
Volgens Meiring is hy baie jammer oor wat gebeur het en dat hy dit nie weer sal doen nie.
Matthews het in ag geneem dat Meiring ’n eerste oortreder is en reeds berading ondergaan het.
“Myns insiens toon jy opregte berou.”
Die streeklanddros het gesê die pastoor se kans om te rehabiliteer is goed.
Hy het egter gesê dat die howe misdade teen kinders as baie ernstig beskou en Meiring gewaarsku dat hy beslis tronk toe sal gaan as hy homself weer aan seksuele aanranding skuldig maak.
Ao. Richard Botha van die eenheid vir gesinsgeweld, kinderbeskerming en seksuele misdrywe was die ondersoekbeampte.
- SAPA