Passasiers moet sitplekgordels dra – minister

2012-12-13 17:45

Kaapstad – Robin Carlisle, LUR vir vervoer in die Wes-Kaap, het gesê owerhede gaan seker maak dat meer passasiers op die agtersitplek van motors veiligheidsgordels dra.

Carlisle het Donderdag gesê padsterftes in die Wes-Kaap het in die eerste 10 dae toegeneem in vergelyking met dieselfde tydperk verlede jaar.

"In die eerste 10 dae van Desember het 62 mense op die Wes-Kaap se paaie gesterf, in vergelyking met 43 in 2011 – 'n toename van 31%," het hy in 'n verklaring gesê.

Van die 62 mense wat gesterf het, is 28 passasiers en 20 voetgangers.

"Dit was 'n baie somber begin tot die feestyd, met ses lewens wat daagliks verloor word."

Hy het gesê die hoë proporsie van passasiersterftes dui daarop dat mense nie veiligheidsgordels dra nie.

Tussen Augustus 2011 en Junie 2012 het verkeersbeamptes in Kaapstad 13 621 boetes uitgereik vir veiligheidsgordels wat nie gebruik is nie, 415 boetes vir veiligheidsgordels wat nie aan die vereiste spesifikasies voldoen nie en 56 boetes is uitgereik vir kinders wat nie reg vasgemaak is nie.

– Volg Nuus24 op Twitter

- SAPA