'Pasop vir voortvlugtige Johan Kotzé'
2012-01-07 08:28
Jana van der Merwe en Marietie Louw-Carstens
Johannesburg – Die vrou wat na bewering deur die voortvlugtige Johan Kotzé aangerand is, is herhaaldelik teen hom gewaarsku deur ’n Vrystaatse vrou met wie hy ’n verhouding gehad het.
Hy het Dinsdag ook glo sy stiefseun, Conrad Bonnette (19), in Modimolle (Nylstroom) doodgeskiet. Die vrou is glo in opdrag van Kotzé verkrag. Haar borste is ook gesny en sy het inwendige beserings opgedoen.
Sarita Venter van Bloemfontein, wat op 23 November 2010 selfmoord gepleeg het, het twee siviele eise teen Kotzé gewen nadat hy sowat ’n halfmiljoen rand by haar “geleen” het.
Twee van haar seuns, Hentie en Hennie de Vos, het Vrydag hul ma se 2010-dagboek waarin sy daagliks noukeurige aantekeninge gemaak het aan Beeld gewys.
Die pleknaam Nylstroom, asook die verkragte vrou se naam en selfoonnommer, is onderskeidelik op 10 Mei, 11 Junie en 19 Julie in dié dagboek aangeteken.
Een van die broers vertel hy het by een van dié geleenthede langs sy ma gesit toe sy die vrou in Modimolle gebel en teen Kotzé gewaarsku het.
“Sy wou haar help en het haar gewaarsku: ‘Pasop vir Johan Kotzé.’
“Sy het vir haar gesê hy is die grootste vark op aarde.”
Hul ma was vroeër ’n dinamiese arbeidskonsultant en bekroonde bemarker, sê hulle.
“Ná Johan Kotzé was sy op geen denkbare manier meer ’n mens nie. Hy het haar geldelik en emosioneel vernietig.”
Venter het aan ’n genetiese longsiekte gely.
Kotzé het volgens die broers vir haar ’n lokval gestel en haar gevra om ’n draai op ’n kwadfiets te ry wat sy vir hom gekoop het.
Hy het haar daarna met beeldmateriaal afgepers wat hy aan haar versekeringsmaatskappy sou stuur om te wys dat sy eintlik “blakend gesond is”.
Hy het dit volgens hulle inderdaad gedoen toe sy nie meer geld aan hom wou gee nie. Haar maandelikse mediese polisuitbetalings is glo daarna gestaak.
Dit het Vrydag ook aan die lig gekom dat Kotzé na bewering talle Vrystaatse vroue met miljoene rande ingeloop het.
Jan Maree van die prokureursfirma Schoeman Maree Ingelyf in Bloemfontein sê hy verteenwoordig vier vroue wat siviele eise teen Kotzé ingestel het nadat hy hulle na bewering gesamentlik uit sowat R1,5 miljoen bedrieg het.
Maree sê dié vroue is almal geskei of weduwees.
Kotzé was blykbaar al vier keer getroud en is besig om van sy vyfde vrou te skei. Hy is op 23 Oktober 2010 met haar getroud.
Dirk van der Merwe, aan wie die huis behoort waarin die grudade gepleeg is, het ná Kersfees saam met Kotzé in die Hazyview-omgewing gaan roei.
Kotzé het volgens Van der Merwe ’n vrou saamgeneem.
“Die vrou het volgens hom nie reg geroei nie. Hy het so kwaad geword en toe slaan hy haar met die roeispaan in die sy,” het Van der Merwe Vrydag gesê.
“My oë het toe oopgegaan oor watter soort mens hy is.”
Volgens hom het Kotzé meer as een keer vir hulle gesê hy het “al ’n swarte doodgeskiet”.
Kotzé is in 1993 van moord aangekla ná die skietdood van Bet Botha (64) in Prieska in die Noord-Kaap. Hy is vrygespreek.
“Ons is bekommerd, want ons weet nie wat in sy kop aangaan nie. Ons is bang dat hy hier aankom,” het Van der Merwe gesê.
Hy probeer glo selfmoord pleeg
Kotzé (50) het glo ná die grudade probeer selfmoord pleeg.
Hy het Dirk van der Merwe Woensdagaand gebel.
Kotzé het die huis in Kerkstraat waarin die treurspel afgespeel het by Van der Merwe gehuur.
“Ek het vir hom gevra: ‘Waar is jy? Waar is jy?” het Van der Merwe gister gesê.
Kotzé het gesê hy is in Pretoria.
“Ek het hom nie geglo nie en hom uitgetrap oor wat hy gedoen het. Hy het gesê hy het al probeer selfmoord pleeg, maar het dit nie reggekry nie.”
Kotzé het toe die oproep beëindig.
Beeld verneem ’n sein van Kotzé se selfoon is Woensdag in die Vryburg-omgewing in die Noord-Kaap deur die polisie opgespoor.
Kotzé is ’n gebore Namibiër wat nog familie daar het.
Grensposte landwyd is aangesê om op die uitkyk te wees vir hom en sy wit Toyota Fortuner met die registrasienommer DCS 392 FS.
Enigiemand met inligting kan kol. Mabisela Mohale by 082 565 8606 bel.
Volg Nuus24 op Twitter
- Beeld