Pasiënt wag ure op vloer vir hulp
2012-01-12 08:30
Kimberley – ’n Tuberkulose-pasiënt wie se lêer na bewering drie keer verlore geraak het, het glo Dinsdag 17 uur op die vloer van die Kimberley-hospitaal gelê sonder om gehelp te word.
Trooi Mcinjane sê hulle het toe maar haar siek man, Ephraim (54), huis toe gevat.
“Hoe kan die hospitaalpersoneel sy lêer drie keer verloor? Hy was op 3 Januarie by die buitepasiënte-afdeling. Toe is hy aangesê om weer op 10 Januarie te kom.
“Ons was stiptelik om 07:00 daar. Hy het ál swakker geword en hulle het hom op die vloer laat lê. Intussen is die lyk van ’n vrou ook daar gelaat. Dit het ure daar gelê voordat dit weggeneem is.
“Wanneer hy so swak is, moet hy ’n drup kry. Die personeel het hom geïgnoreer.
“Hy is later die aand op ’n bed gesit. Dit het later onuithoudbaar geword. Ons het hom teen middernag huis toe geneem. Daar kon ons hom immers kos en water en beter versorging gee.”
’n Ander familielid sê dié hospitaal “is papvrot en vieslik vuil”.
“Die stank is aardig. Ek moes die badkamer gebruik. Daar was bloed op die mure en krane. Houers met uriene het oral gestaan.”
Lulu Mxekezo, woordvoerder van die departement van gesondheid, sê die hospitaalbestuur is nie bewus van Mcinjane se probleme nie.
“Ons het geen rekord van hom nie. Hy is voorheen deur die hospitaal behandel en na ’n kliniek verwys. Daar is baie mense wat hulself ongevraag hierheen verwys. Dit vererger die werkslading en wagtye.
“Die hospitaal word gereeld skoongemaak. Personeel doen gereelde inspeksies. Pasiënte en besoekers wat toiletsitplekke, krane en pype steel, maak dit moeilik om die geriewe netjies te hou.
“Ons vra dat die publiek ons geriewe respekteer en ander pasiënte, besoekers en kliënte in ag neem. Ons doen ’n beroep op die publiek om nie die noodgevalle-afdeling as ’n buitepasiënte-eenheid te gebruik nie.”
In Desember het die noodgevalle-afdeling sowat 3 720 nie-ernstige gevalle hanteer. Daar was 915 werklike noodgevalle. Sowat 2 334 pasiënte is sonder verwysing en 2 301 met verwysings behandel.
“Noodgevalle kry voorkeur en word onmiddellik behandel. As enigiemand kwessies met die hospitaal wil bespreek, moet hulle ons by 0800-009-12/3 bel,” sê Mxekezo.
Volg Nuus24 op Twitter
- Volksblad