Pasella, Top Billing in die knyp
2009-09-09 11:51
Kaapstad - Werkers van SABC3 se gewilde leefstylprogram Top Billing en die SABC2 se Afrikaanse program Pasella, moes ‘n 10% salarisverlaging aanvaar ten spyte daarvan dat die maatskappy pas R400 000 se bouwerk aan die kantore gedoen het, berig The Times
Tswelopele Productions, die maatskappy wat die twee programme vervaardig, het ook sy werkers laat betaal.
'n Werknemer, wat annoniem wil bly, het aan Nuus24 hierdie griewe erken en gesê sommige mense by Tswelopele is baie ontevrede en bekommerd.
Daar het ook gerugte die ronde gedoen dat die gewilde Top Billing van die lug af gehaal sal word in Januarie. Vuyo Maqezu van Tswelopele het egter hierdie gerugte ten sterkste ontken toe Nuus24 die maatskappy kontak.
"Ons gaan slegs volgende jaar vir 'n maand lank episodes uitsaai wat die afgelope 16 jaar se hoogtepunte uitbeeld," het sy aan Nuus24 gesê.
Kaizer Kganyago, die woordvoerder vir die SABC, het verlede maand bevestig dat die uitsaaier seker programme se kontrakte nie sal hernu nie. Hy het blykbaar beloof om die situasie by Tswelopele te ondersoek.
- Nuus24