Partye win nog advies in oor plaza
2012-02-02 08:55
Kaapstad – Die Wes-Kaapse regering win ’n regsmening in oor of ’n parlementêre besluit nodig is om ’n gedeelte van ’n nasionale park te deproklameer ná protes oor die omstrede Chapmanspiek-tolplaza.
En diegene gekant teen die tolplaza win steeds hul regsadvies met omsigtigheid in.
Die Wes-Kaapse regering en die tolpad se konsessiehouer, Entilini, word sedert vroeg vandeesmaand skerp gekritiseer oor hul planne om die tolplaza aan Houtbaai se kant van die pas te bou.
Len Swimmer, voorsitter van die Inwonersvereniging van Houtbaai, het gesê hulle het al met verskeie regslui gekonsulteer om ’n hofinterdik te bekom om die bouwerk, wat Maandag begin het, te stop.
“Ons wag nog op ’n antwoord van die regspan. Ons is baie versigtig. Ons wil nie die saak verloor nie.”
Helen Zille, Wes-Kaapse premier, het gereageer op ’n memorandum van die Civil Rights Action Group, een van die Houtbaaise organisasies wat die projek teenstaan.
Van hul vernaamste besware, met Zille se reaksie wat daarop volg, is:)Chapmanspiek is nie lewensvatbaar as ’n tolpad nie.
“Die finansiële ooreenkoms is op ’n kontrak van 30 jaar gegrond en terwyl hoë aanvanklike koste verwag is, sal die winsgewendheid op lang termyn duidelik wees,” het Zille gesê en bygevoeg die administratiewe koste van die besware en gevolglike vertragings verhoog die geldelike las van die provinsie.
Volgens Wes-Kaapse wetgewing kan die pad se status as tolpad verwyder word.
“Eenvoudig gestel, as die pas van 9 km nie getol word nie, kan dit nie oop bly nie. Alternatiewe roetes is beskikbaar, soos geblyk het uit die vier jaar wat die pad gesluit was,” het Zille gesê.
Die tolplaza is binne die Tafelberg Nasionale Park geleë, wat die hoogste vlak van natuurbewaring geniet.
Zille het gesê die pad is nie deel van die landskap nie en moet deur die regering bestuur word. Sy glo ook nie dit sal ’n presedent vir die gebruik van nasionale parke se grond skep nie.
’n Resolusie van die parlement word benodig om ’n gedeelte van die Tafelberg Nasionale Park te deproklameer.
“Die Wes-Kaapse regering is besig om ’n regsmening hieroor in te win,” het Zille gesê. Sy het bygevoeg die korrekte prosedures is gevolg.
– Volg Nuus24 op Twitter
- Die Burger