Partye kap regering ná soveelste plaasmoord
2011-02-21 09:20
“Die regering is self moordenaars,” sê Martha Dean, die ACDP se sekretaris-generaal in die Vrystaat.
Politieke partye het Sondag sterk gereageer op die nuutste plaasaanval in die Vrystaat waarin Helgard Muller, van die plaas Mara in die Frankfort-distrik, vermoor is.
Dean sê mense se gesukkel om vuurwapenlisensies te bekom, is niks anders as ontwapening deur die regering nie.
Volgens haar kan mense hulself gevolglik nie verdedig nie en die regering moet hiervoor verantwoordelik gehou word.
“Dit is ’n skreiende skande dat die regering nie sy mense kan beskerm nie. Ons swart broers en susters huil saam.”
Jan van Niekerk, VF+-wetgewerlid, sê sy party veroordeel dié barbaarse moord en eis dat die regering nou daadwerklik ingryp, plaasmoorde veroordeel en dit moet voorkeur geniet.
“Dit is kommerwekkend dat die ANC en regering baie gou is om voorvalle soos die Reitz-video by die Universiteit van die Vrystaat (UV) te veroordeel, maar oor plaasmoorde swyg hulle,” sê Van Niekerk.
Sibongile Besani, provinsiale sekretaris van die ANC in die Vrystaat, het Sondag by navraag gesê hulle veroordeel geweld en misdaad.
Roy Jankielsohn, Vrystaatse DA-leier, sê mooi woorde alleen gaan nie die probleem oplos nie. Die regering in samewerking met die boeregemeenskap moet daadwerklike stappe doen om misdaad op die platteland te bekamp.
“Dit wil voorkom asof misdadigers ons mense op die platteland as sagte teikens beskou.
“Die tyd wat boere hul deure kon ooplos of rustig op hul eie grond kon rondbeweeg, is verby. Ons boere en hul werkers sal te alle tye op hul hoede moet wees.”
Ds. Theunis Botha, leier van die Christen-Demokratiese Party (CDP), sê periodieke veroordelings deur die ANC gaan eenvoudig nie die probleem oplos nie.
“In elk geval nie solank die ANC aandring op die ‘reg’ om liedjies soos ‘Maak dood die boere’ te sing nie.”
Dennis Bloem, Cope-LP van die Vrystaat, sê wanneer ’n boer vermoor word, word Suid-Afrikaners beroof van kos.
“Dit is onaanvaarbaar.”
- Volksblad