Partye beur voort oor regter Ngcobo
2009-08-20 06:39
Kaapstad – Die DA, Cope, IVP en OD gaan voortbeur in hul pogings om pres. Jacob Zuma se benoeming van regter Sandile Ngcobo as hoofregter ongedaan te maak.
Dié partye het Zuma se verduideliking gister dat hy Ngcobo nie aangewys het nie, maar bloot benoem het, verwerp.
Mnr. Geordin Hill-Lewis, ’n DA-woordvoerder, het aangedui die partye is oortuig daarvan Zuma het reeds oor Ngcobo besluit en daar is geen kans dat politieke partye se inspraak ernstig opgeneem gaan word nie.
Dit volg op ’n brief wat Zuma aan die partyleiers gestuur het in antwoord op kwellinge dat die proses nie grondwetlike voorskrifte gevolg het nie omdat daar glo nie behoorlike konsultasie plaasgevind het nie.
Zuma het hulle die versekering gegee dat hy nog geen finale besluit geneem het nie en “natuurlik” alle menings oor Ngcobo as sy voorkeurkeuse in ag sal neem.
Die vier partye is egter onwrikbaar. Volgens Hill-Lewis verskil hulle met die president se vertolking van hoe die proses moet werk en maak hulle veral beswaar teen die feit dat Zuma die benoeming aangekondig het nog voordat hulle geraadpleeg is.
Dit is egter onduidelik wat die partye se verwagting is, behalwe dat hulle in nóg ’n brief aan Zuma daarop gaan aandring dat die president die benoeming van Ngcobo terugtrek.
Die president het egter reeds gesê hy gaan dit nie doen nie.
Zuma het gister, ná ’n vergadering in Tuynhuys met mnr. Athol Trollip, DA-leier in die parlement, gesê sy onlangse uitlating aan die Nasionale Persklub dat hy Ngcobo bo ander kandidate “aanstel”, was in antwoord op ’n vraag en ’n “glips”. “Die geskrewe teks van die aankondiging sê duidelik ek benoem Ngcobo en dat die konsultasieproses nou ’n aanvang neem.”
Hy het in sy gesprek met Trollip te kenne gegee hy is verleë daaroor dat briewe aan opposisieleiers waarin hul insette oor Ngcobo se benoeming gevra word, uitgestuur is nadat hy die aankondiging gemaak het.
“Ek verwelkom die opposisie se benoeming (eergister) van regter Dikgang Moseneke omdat ek graag ruimte vir bespreking wil skep. Ek wil met die opposisie en die Regterlike Dienskommissie daaroor praat.”
Prof. Pierre de Vos, grondwetkenner van die Universiteit van Kaapstad, het gesê opposisiepartye het geen kans om die saak deur die howe te besleg nie en meen partye het hul punt gemaak.
“Die Grondwet bepaal Zuma moet raadpleeg. Partye hoef nie met hom saam te stem nie en die realiteit is die besluit bly syne. Ek sou dink partye aanvaar Zuma se verskoning en verduideliking en beweeg aan.”
- Die Burger