Parool vir 65 bendelede
2011-03-24 08:33
Kaapstad - Die vrylating vanjaar van 65 toplede van verskillende Wes-Kaapse bendes op parool kan toenemende geweld in die provinsie laat opvlam.
Hy is in die lig van die sluipmoord op ’n bendeleier in Kaapstad bekommerd oor wat 65 misdadigers wat op vrye voet is kan beteken, het die provinsiale minister van gemeenskapsveiligheid, mnr. Albert Fritz, gesê.
Dit het gister bekend geword Cyril Beeka, die bendebaas wat Sondag in ’n sluipmoord naby die kampus van die Universiteit van Wes-Kaapland doodgeskiet is, het in Januarie gehoor sy naam verskyn op ’n moordlys.
Fritz het gister op ’n nuuskonferensie gesê dit is die gemeenskap se reg om te weet dat die 65 mans almal vanjaar op parool vrygelaat gaan word. Hy wou egter nie die name van die 65 bekend maak nie.
Volgens Fritz mag die name van mense wat op parool vrygelaat word net deur die minister van korrektiewe dienste bekend gemaak word.
Fritz se bekommernis spruit uit die bendegeweld wat ’n week of twee gelede in Lavender Hill, Retreat en Steenberg gewoed het.
Hy het gesê sy grootste vrees is dat daar weer erge geweld gaan uitbreek in gebiede waarheen die 65 moet terugkeer.
“Kyk wat het verlede jaar in Hanover Park gebeur toe ’n bendeleier vrygelaat is. Daar was weer geweld soos hy probeer het om sy turf (gebied) groter te maak.”
Fritz het ook bekend gemaak dat verskillende belanghebbendes gisteroggend oor die bendegeweld in verskeie woongebiede op die Kaapse Vlakte vergader het.
Volgens die minister is hy tevrede met die uitkoms van die vergadering, en was selfs Pagad op die vergadering verteenwoordig.
Hy het gesê een van die strategieë waarop besluit is, is om gemeenskapspolisiëringsforums beter vir intelligensie-doeleindes aan te wend.
Gemeenskappe gaan ook aangemoedig word om by buurtwagte aan te sluit, terwyl beter en meer sigbare polisiëring bevorder sal word.
- Volg Nuus24 op Twitter.
- Die Burger