Parlement moet sê oor bul-ritueel
2009-12-01 15:48
Pietermaritzburg - 'n Regter in die Pietermaritzburgse hooggeregshof het voorgestel dat 'n bandopname van 'n omstrede Zoeloe-ritueel gemaak word en aan die parlement voorgelê word.
Regter Nic Van der Reyden het gesê dit moeilik om 'n besluit te maak omdat die ritueel terugstaan na die hart van die Zoeloe-tradisie.
Van der Reyden het gesê hy ontduik nie die uitspraak nie, maar dat dit geskik sal wees vir die parlement om die situasie te hanteer as daar bevind word dat die bul op 'n wrede manier doodgemaak word.
Die diereregtegroep Animal Rights Africa (ARA) het die Zoeloe-koning en die KwaZulu-Natalse premier Zweli Mkhize hof toe gesleep om die Ukweshwama-ritueel te keer.
Ukweshwama is 'n simboliese manier om God te dank vir die eerste vrugte van die seisoen.
Dié ritueel word op 5 Desember by Zwelithini se paleis in Nongoma gehou.
In die ritueel word ’n groot swart bul uit die koning se kuddes gekies en in ’n kraal gejaag, waar hy kaalhand deur tien jong Zoeloe-krygers getakel word. Die bul word dan platgetrek en verskeur.
ARA voer aan dat die bulle tydens dié ritueel wreed doodgemaak word.
Die regter het gesê om die slagting van die bul te keer sal wees om Katolieke te verhoed om nagmaal te eet.
Hy het gesê die kwessie van die slagting van die bul moet na gekyk word in die regte konteks en hy glo dat dit nie deur mal mense gedoen word nie.
"Dit word al jare gedoen. Dit word deur Zoeloes, wat die grootste bevolkingsgroep in die land is, gedoen. Daar is ongeveer 10 miljoen Zoeloes in die land," het hy gesê.
Van der Reyden het gesê baie jong Xhosa-mans sterf jaarliks weens besnyding, maar dié ritueel is nie gekeer nie, omdat dit belangrik is vir die Xhosas.
Die regter het die aansoeker se regsverteenwoordiger, Michael Smithers, gevra of hy dink die parlement is bewus van dié ritueel.
Smithers het gesê hy is nie seker of die parlement daarvan bewus is nie.
"Sê jy pres. Jacob Zuma is nie bewus hiervan nie? Hy is 'n Zoeloe. Hy moet hiervan weet."
Van der Reyden het gesê soos hy dit verstaan glo Zoeloes as hulle die bul doodmaak hulle krag na hul koning oorgedra.
"As ek beslis dat die bul nie doodgemaak moet word nie, beteken dit dat die krag nie na die koning oorgedra word nie. Kom ons sê die koning word ná die uitslag deur weerlig getref, sal die mense sê dis oor ek hul ritueel onderbreek het."
Hy het die Zoeloes as 'n baie trotse nasie met 'n baie ryk geskiedenis beskryf.
"Hulle is 'n baie trotse nasie. Die Britte het hul gevegte teen die Zoeloes verloor."
Smithers het aangevoer dat sy kliënte telkemale probeer het om met die koning en die regering oor dié kwessie te vergader.
"Die saak is na die hof geneem ná my kliënte telkemale gefaal het om 'n geleentheid te kry om dié kwessie te bespreek."
Die partye sal na middagete sê of hulle sy voorstel aanvaar.
– Sapa