Parlement kán baas wees van mediatribunaal
2010-08-11 07:28
Volksblad
Kaapstad - Die parlement, waar die ANC met 264 setels uit 400 oorheers, is neutraal genoeg om baas te wees van die mediatribunaal waarmee die ANC hoop om Suid-Afrika se “bleek, manlike” koerante vas te vat.
Só het Jackson Mthembu, ANC-woordvoerder, Dinsdag gesê by ’n voorligtingsessie oor die media-appèltribunaal wat die ANC ná sy Durban-beleidsberaad in September op die been wil bring.
Met dié tribunaal wil die ANC volgens Mthembu ’n einde maak aan “onverantwoordelike en misleidende” beriggewing, “sensasionele” joernalistiek en berigte wat inbraak maak op die privaatheid van Suid-Afrikaners.
Hy het ook ingevaar onder koerantgroepe wat nog in wit of buitelandse hande is. “Ons behoort nie hier te sit waar alles oor ons geskryf word, maar ons besit nie die instrumente (in die media) nie. Sommige drukmedia-maatskappye word deur buitelanders besit. Selfs wanneer eienaarskap by Suid-Afrikaners berus wat bleek en wit is, is dit korrek? Dit kan nie wees nie.”
Opposisiepartye, joernaliste en mediabase het die laaste week ’n verenigde front teen die voorgestelde tribunaal gevorm, asook teen die Wetsontwerp op die Beskerming van Inligting, wat tronkstraf inhou vir joernaliste wat staatsgeheime bekend maak.
Hulle vrees onder meer ’n tribunaal wat aan die ANC-beheerde parlement verslag doen, sal nie onafhanklik sal wees nie.
Mthembu het egter gesê ’n ANC-gelaaide parlement is “deel van die demokrasie”. Suid-Afrikaners het vir die party gestem en dit was die ANC “wat geveg het vir die vryhede wat julle nou geniet”.
“Met wie moet die parlement dan gelaai wees? Die DA?” het hy gevra. “Ek het baie vertroue in die parlement. Hy sal waarskynlik niks doen wat nie konstitusioneel is nie.”
Dr. Siyabonga Cwele, minister van staatsveiligheid, in wie se departement die wetsontwerp sy oorsprong het, sal die parlementêre ad hoc-komitee gemoeid met die voorgestelde wet Vrydag toespreek.
Athol Trollip, die DA se parlementêre leier, het op ’n nuuskonferensie gesê die party sal alles in sy mag doen om die wetsvoorstel te pootjie.
“Ons gaan ANC-LP’s in portefeuljekomitees, in die parlementsgange, buite die parlement, informeel en formeel bearbei om op grond van hul gewete teen die wet te stem.
- Volksblad