Parlement draai sy geldkraan styf toe vir Cope
2010-07-08 09:38
Die Burger
Kaapstad - Die verskaffing van alle parlementêre geld aan Cope is gestaak.
Dié beleërde party sal die gordel tydelik moet intrek nadat die parlement duidelikheid gevra het oor uitgawes in sy geldstate vir 2009-’10.
Die sekretaris van die parlement, Zingile Dingani, het ’n brief aan Cope se hoofsweep, Mbhazima Shilowa, gestuur waarin hy versoek word om lig te werp op sekere uitgawes.
Cope het verlede jaar sowat R20 miljoen vir parlementêre uitgawes en kiesafdelingswerk ontvang.
Die party het in Mei ’n oudit van sy finansiële verslae vir verifikasie by die parlement ingedien.
Luzuko Jacobs, parlementêre woordvoerder, het Woensdag verduidelik dat indien vrae as deel van dié verifikasieproses ontstaan, die parlement duidelikheid van die betrokke party vereis. “Dit is wat in dié geval gebeur het.”
Hy wou nie besonderhede gee oor watter kwessies duidelikheid vereis nie. Cope het in die huidige boekjaar geld vir April en Mei ontvang.
“Die kwessies het opgeduik nadat ons die finansiële state ontvang het. Ons het egter in dié tyd ook ’n versoek van die partyleier, Mosiuoa Lekota, ontvang dat ons tot verdere kennisgewing alle geld aan die party moet staak.”
Lekota, wat met Shilowa in ’n leierstryd gewikkel is, het in April beweer die party se parlementêre finansiële state is nooit verlede jaar aan ’n oudit onderwerp nie.
Hy het tóé die dolk reguit op Shilowa gemik, wat as hoofsweep die rekenpligtige amptenaar is.
Philip Dexter, partywoordvoerder, het gesê Cope sal met die parlement in gesprek tree. “Die sentrale nasionale komitee van die party het ’n interne forensiese oudit van die finansiële verslae versoek.”
Pieter du Toit berig eerw. Mvume Dandala, Cope-LP en parlementêre leier, het reeds ’n bedankingsbrief geskryf, maar dit nog nie by die sekretaris van die parlement laat aflewer nie. Cope se nasionale komitee het Vrydag besluit om Lekota in Dandala se plek na die parlement te stuur, maar niks kan gebeur totdat die sekretaris die bedanking aanvaar het nie.
Dandala het al teenoor Die Burger bevestig hy het bedank, maar dit wil nou voorkom of hy die Shilowa-groep help deur op sy setel te talm.
Dié groep blykbaar probeer verhoed dat Lekota na die parlement gaan omdat dit die deur vir forensiese ondersoeke na die party se geldsake kan oopstel.
- Volg Nuus24 op Twitter.
- Die Burger