Parlement begroot R6m. vir staatsrede
2012-02-08 07:00
Kaapstad – Die parlement het R6 miljoen begroot vir Donderdagaand se parlementsopening en die onthaal ná pres. Jacob Zuma se staatsrede.
Dié bedrag is bykans dieselfde as verlede jaar, het voorsittende beamptes van die parlement Dinsdag volgehou.
Tóg word die onthaal nie vanjaar soos gewoonlik in ’n swierige venue soos die Kaapstadse internasionale konferensiesentrum gehou nie, maar bespaar die parlement koste deur dit in ’n markiestent in die parkeerterrein oorkant die parlement te hou. Die parlement besit dié terrein.
Vervoerkoste word ook bespaar omdat gaste “sommer net oor die pad kan stap”, het Max Sisulu, speaker van die parlement, Dinsdag op ’n nuuskonferensie gesê.
Die tema vir vanjaar se geleentheid is “die kennisekonomie en ontwikkelingsgeleenthede”. Dit is geïnspireer deur Suid-Afrika se bod om die reuse-teleskoop, die Square Kilometer Array (SKA), te huisves.
Sisulu het gesê die rede vir die besluit vir vanjaar se tema is dat Suid-Afrika saam met agt ander lande op die vasteland die bod ingesit het om die SKA te huisves.
’n Besluit oor waar die SKA gehuisves gaan word, word teen einde Maart verwag.
Sisulu het gesê indien die land suksesvol is om die SKA in die Karoo te huisves, sal dit ’n groot positiewe uitwerking op tegnologie, wiskunde en wetenskap in die land hê.
Volgens hom kan Suid-Afrikaners “werk, werk, werk” in Zuma se staatsrede verwag.
“Werk, werkskepping en die groei van die ekonomie” gaan waarskynlik sterk in die toespraak na vore kom.
Zuma se toespraak sal om 19:00 regstreeks op televisie, radio, grootskerm-TV in openbare plekke en op die parlement se webwerf uitgesaai word.
Vanjaar se seremonie sal oudergewoonte deur voormalige staatshoofde, soos oudpresidente Thabo Mbeki en F.W. de Klerk, bygewoon word. Oud-adj.pres. Baleka Mbete, dr. Frene Ginwala, voormalige speaker van die Nasionale Vergadering, oudhoofregter Pius Langa en mnr. Lovemore Moyo, speaker van die parlement in Zimbabwe, sal ook die verrigtinge bywoon.
Volg Nuus24 op Twitter
- Die Burger