Parktown Boys-saak wéér van hofrol geskrap
2012-01-20 13:34
Johannesburg – 'n Saak van aanranding teen ‘n groep leerders van Parktown Boys’ High is vir die tweede keer van die hofrol geskrap, is Vrydag berig.
Pene Kimber, die ma van een van die beweerde slagoffers, het aan The Star gesê die saak is Donderdag van die Johannesburg-landdroshof se hofrol geskrap.
Die landdros het die saak verwerp, aangesien die ondersoekbeampte nie dagvaardigings aan al die beskuldigdes uitgereik het nie, terwyl sommige ook nie onderteken was of die regte datums opgehad het nie.
Kimber het in Februarie 2009 ‘n beweerde aanval op haar seun deur 12 matriekleerders by die skool aangemeld.
Haar seun en ander graad 11-leerders in sy koshuis is glo uitgetrek, waarna Deap Heat op hul geslagdele gesmeer is en as deel van 'n ontgroeningsrituel met krieketkolwe, hokkiestokke, gholfstokke en swepe geslaan is.
Die saak is in November 2010 van die rol geskrap. Die saak toe 12 keer vantevore uitgestel.
Kholeka Gcaleka, die adjunkdirekteur van openbare vervolging, het bevestig dat haar kantoor besluit het die saak moet verhoor word.
“Voorstelle is by die kantoor van die direkteur van openbare vervolging ingedien... Ná in diepte oorwegings het die direkteur gesê vervolging in die saak teen die beskuldigdes moet voortgaan,” het Gcaleka gesê.
Kimber het gesê die saak het eers agt maande ná dié besluit op die hofrol verskyn.
“Ek het net aanhou baklei. Dit het my regtig laat besef dat jy dit alles self moet laat gebeur as jy wil hê geregtigheid moet geskied," het sy gesê.
– Volg Nuus24 op Twitter
- SAPA