Parktown Boys-saak van hofrol geskrap
2010-11-25 11:34
Johannesburg – Die saak teen ‘n groep leerders van Parktown Boys Hoërskool, wat teregstaan op aanklagte van aanranding wat verband hou met ‘n inisiasie-seremonie, is van die hofrol geskrap, het The Star Donderdag berig.
Pene Kimber, die ma van een van die beweerde slagoffers, het aan die koerant gesê dat die saak in die Johannesburgse landdroshof van die rol verwyder is omdat dit al 12 keer uitgestel is.
Nietemin het sy gesê sy hoop dit sal weer op die rol geplaas word. Sy het bygevoeg dat die hoof- aanklaer, Menzi Simelane, gaan besluit of die seuns ‘n rehabilitasie-program sal ondergaan en of hulle in die hof sal verskyn.
“Hierdie saak moet hof toe gaan. Die boodskap wat ek kry is dat jou kind ‘n slagoffer van aanranding kan wees, maar die saak sal nie in die hof verskyn nie,” het Kimber gesê.
Haar seun was een van ‘n groep graad-11 leerders wat verlede jaar uit die bed gejaag, kaal uitgetrek en met krieketkolwe, hokkiestokke, gholfstokke en swepe geslaan is.
Die Nasionale Vervolgingsgesag was nie onmiddellik beskikbaar om die berig te bevestig nie.
Volg Nuus24 op Twitter
- SAPA