Paramedikus: Terre'Blanche was erg beseer
2011-10-14 15:23
Ventersdorp – Die eerste persoon wat die lyk van die vermoorde AWB-leier, Eugene Terre'Blanche, gesien het, het getuig dat sy lyfband los was en sy privaatdele uitgesteek het.
"Sy broek en sy gordel was oop. Sy gulp was oop en sy privaatdele het uitgesteek," het die paramedikus Robert van Heerden in die rondgaande hof op Ventersdorp gesê.
"Onder die penis was daar vog. Watse vog kan ek nie vir meneer se nie."
Van Heerden het gesê hy het Terre'Blanche 25 jaar lank geken, maar kon hom nie (die aand van die moord) herken nie.
Hy het in Afrikaans getuig en sy getuienis is in Setswana vertaal.
"Hy was baie sleg seergemaak, gesny en geslaan," het Van Heerden gesê.
"Ek het nie verwag om iemand in so ‘n toestand so te sien nie."
Die eerste ding Van Heerden gesien het toe hy in die slaapkamer kom, was 'n plas bloed op die grond, het hof op gehoor.
Toe Van Heerden sy flitslig in die kamer rondbeweeg, het hy bloed van die bed op die grond sien drup, asook bloed op die gordyne en mure.
Hy het vir 'n pols gevoel en besef Terre'Blanche is dood.
Van Heerden het gesê die lyk het afgekoel en dat hy nie kon sê vir hoe lank Terre'Blanche daar gelê het nie.
Hy het gesê hy het nie die lyk geskuif nie.
'n Flitslig is gebruik omdat die ligskakelaar stukkend en die plaashuis donker was.
Chris Mahlangu en die minderjarige word daarvan beskuldig dat hulle Terre'Blanche op sy plaas verlede jaar in 'n loondispuut vermoor het.
Albei het onskuldig gepleit op aanklagte van moord, huisbraak en poging tot roof met verswarende omstandighede.
Die verhoor is tot Maandag uitgestel.
– Volg Nuus24 op Twitter
- SAPA