Padvalk glo aangerand: 2 onskuldig
2010-06-03 10:46
Beeld
’n Polisiekolonel van Germiston en sy dogter is Donderdag onskuldig bevind op aanklagte dat hulle ’n metropolisievrou aangerand en ’n “swart teef” genoem het.
Kol. Juan André Dawson (47) en Angelica van Greunen (30), sy dogter, is aangekla van dwarsboming van die gereg en dat hulle Mapule Podile (42) aangerand en in die uitvoering van haar pligte gehinder het.
Van Greunen is ook van crimen injuria aangekla oor die beweerde “swart teef”-opmerking.
Streeklanddros Livingstone Mahlangu het Podile en ander getuies se weergawes as onwaar en onwaarskynlik afgemaak.
Podile het Van Greunen en Jaco Rudman, haar vriend, in September verlede jaar in Kempton Park laat stilhou omdat Rudman glo nie by ’n stopteken stilgehou het nie. Podile wou toe glo R50 omkoopgeld hê.
’n Woordewisseling en gestampery het tussen Podile en Van Greunen ontstaan. Volgens Podile het Van Greunen haar in die gesig geklap en gesê haar (Van Greunen se) pa is ’n polisielid.
Dawson het kort daarna met sirenes en blou ligte daar aangekom.
Podile het intussen versterkings aangevra. Dawson is op die toneel geboei, met pepersproei gespuit en agterin ’n vangwa na die Norkem Park-polisiekantoor gebring.
Mahlangu het onder meer daarop gewys dat geen kaartjie uitgereik is vir die aanvanklike “oortreding” dat Rudman nie by die stopteken stilgehou het nie.
Volg Nuus24 op Twitter.
- Beeld