Padkrisis: Vinger wys na Dladla
2012-02-09 08:03
Bloemfontein – 'n Omstrede tenderpreneur van Mpumalanga, Jacob Dladla, staan in die middel van die Vrystaatse padkrisis.
Dladla se maatskappy, MRD Consulting Engineers, is as die projekbestuursmaatskappy vir die herstel van 12 van 23 swak paaie in die provinsie aangestel.
Bou- en herstelwerk aan dié 12 paaie is intussen vertraag weens beweerde grootskeepse tenderkorrupsie en ongeldige kontrakte.
Dladla is einde 2009 onder ’n wolk van tenderbedrog, finansiële wanbestuur en growwe nalatigheid weg by die Mbombela-munisipaliteit op Nelspruit as munisipale bestuurder.
Hy is destyds op vyf aanklagte, wat onder meer verband gehou het met tenderbedrog vir die bou van die stadion in Nelspruit, skuldig bevind.
Die totale waarde van die 12 Vrystaatse kontrakte wat deur MRD aan 12 kontrakteurs toegeken is, het R1,9 miljard beloop.
Van die kontrakteurs moes na bewering ’n bedrag betaal om ’n kontrak te kry.
Volksblad het betroubaar verneem dat miljoene rande na bewering in ’n Amerikaanse bankrekening van Dladla, of ’n maatskappy van hom, inbetaal is.
Die owerheid probeer nog om dié geld op te spoor.
Dié skokonthullings kom te midde van een van die grootste padkrisisse in die land.
Dladla het hom ná sy afdanking as munisipale bestuurder tot die arbeidshof gewend.
Ná ’n uitgerekte verhoor het hy en die munisipale raad ’n skikking bereik waarvolgens die raad aan hom ’n goue handdruk van sowat R1,5 miljoen gegee het.
Die speaker van die raad destyds, Jimmy Mohlala, is in 2009 voor sy huis vermoor, kort voordat hy glo teen Dladla sou getuig in sy dissiplinêre verhoor.
Mohlala was glo ook op die punt om ’n klag van bedrog by die polisie in te dien wat verband gehou het met die bou van die WB 2010-sokkerstadion in Nelspruit.
’n Jaar later is Sammy Mpatlanyane, destydse woordvoerder van die Mpumalanga se departement van sport, kuns en kultuur, ook by sy huis in Nelspruit vermoor. Mpatlanyane het korrupsie in die provinsie rondom die aanbied van WB 2010 aan die lig gebring.
Elzabé Rockman, direkteur-generaal van die Vrystaat, het Woensdag gesê die provinsiale regering het verskeie stappe gedoen om die omstredenheid rondom die 23 kontrakte op te los, onder meer ’n forensiese oudit en dissiplinêre optrede teen senior amptenare.
“Die forensiese verslag sal waarskynlik middel van vandeesmaand aan die provinsiale uitvoerende raad voorgelê word en die dissiplinêre optrede sal teen die einde van van die maand afgehandel word,” het Rockman gesê.
Volksblad het Dladla Woensdag om kommentaar oor die padkontrakte en beweerde korrupsie genader.
Hy het gesê hy sou graag wou kommentaar lewer, maar sy kliënt, die departement, het hom verbied om dit te doen. Alle kommunikasie met die media moet volgens hom deur die departement geskied.
Volg Nuus24 op Twitter
- Volksblad