Paartjie vra later borgtog ná baba se ontvoering
2013-01-21 15:19
Johannesburg – 'n Pakistanse paartjie wat daarvan aangekla is dat hulle 'n baba ontvoer en probeer het om sy oppasser te vermoor, sal volgende week om borgtog aansoek doen, het die Johannesburgse landdroshof Maandag gehoor.
Khalid Ayub en Khadija Khan sal tot 28 Januarie in polisie-aanhouding bly.
Die hof probeer vasstel of Ayub wettig in die land is. Khan is volgens berigte in Suid-Afrika gebore.
Luidens die klagstaat staan die twee ook tereg op aanklag van roof.
Op 8 Januarie het hulle na bewering die ses maande oue Revelation Jones uit sy ouerhuis in Bezuidenhout Valley ontvoer en probeer om sy oppasser keelaf te sny. Die paartjie het 'n kamer in die gesin se huis gehuur.
Die seun se pa het 'n SMS-boodskap ontvang, waarin die paartjie R100 000 geëis het in ruil vir die baba se veilige terugkeer.
Die twee is op 10 Januarie ná 'n wenk van die publiek in Fordsburg in hegtenis geneem. Die baba was ongedeerd toe hy gevind is.
Khan (36) het twee seuns (twee en ses jaar oud) en 'n sewejarige dogter uit 'n vorige huwelik.
Sy is sowat sewe maande swanger met haar vierde kind.
Ná die paartjie se eerste hofverskyning verlede week, het Khan se pa, Abdul, aan joernaliste gesê die paartjie het met die baba na die die huis gekom, maar geweier om te sê waar hulle hom gekry het.
Abdul het gesê sy dogter was "bang en het baie gehuil".
Niemand van die Jones-gesin het die hofverrigtinge bygewoon nie.
– Volg Nuus24 op Twitter
- SAPA
