Paartjie tronk toe vir liefdesdriehoek-moord
2011-05-17 20:51
Johannesburg - ‘n Man en sy vrou is deur die Hooggeregshof in Pietermaritzburg gevangenisstraf opgelê vir die moord in 2007 op haar skelmpie en pa van haar driejarige dogter.
Regter Piet Koen het Amith Rajcoomar tot 18 jaar gevangenisstraf gevonnis en haar man, Amith Sewkarran, tot 14 jaar. Hulle is skuldig bevind van die moord op Sandesh Poorun.
Koen het gesê Rajcoomar en Poorun was in ‘n verhouding vandat hy 19 en sy 15 jaar oud was, en dat sy met hom wou trou.
Poorun wou egter nie die verantwoordelikheid van die huwelik of vaderskap aanvaar nie, maar daar was getuienis dat hy ook nie wou hê enigiemand anders moes haar hê nie.
Hy het dikwels vir Rajcoomar en Sewkarran geteister – soveel so dat sy interdikte teen hom gekry het.
Hy het die interdikte geïgnoreer, maar toe ‘n polisiebeampte haar gevra het of sy wil hê hy moet in hegtenis geneem word, het sy nee gesê.
Koen het gesê Poorun het die genot van vaderskap en ‘n buite-egtelike verhouding gehad, maar wou nie die verantwoordelikhede aanvaar nie.
Sewkarran het Rajcoomar liefgehad, ondanks haar verhoudings met Poorun. Hy het Poorun se kind as sy eie aanvaar.
Poorun is dood nadat Rajcoomar hom na ‘n lodge gelok en hom dronk gemaak het.
Terwyl hy op ‘n bed gelê het, het die paartjie besluit om hom te verwurg.
Rajcoomar het gehelp deur Poorun op die bed vas te druk en sy neus toe te hou.
Toe hy sy bewussyn verloor het, het hulle hom in Sewkarran se kar versteek, brandstof gekoop, uit die stad gery, Poorun vol brandstof gegooi en hom aan die brand gesteek.
Hulle het erken dat hulle hom verwurg het, maar bewyse het getoon daar was roet in sy longe, wat hy moes ingeasem het.
Koen het gesê die moord en hul pogings om nie betrap te word nie, was amateuragtig.
Poorun se familie het ná die verhoor gevoel die vonnisse was te lig. Rajcoomar en Sewkarran se families was verlig.
- Volg Nuus24 op Twitter
- SAPA