Paartjie in hof ná moord op polisieman

2013-01-29 12:28

Kaapstad – 'n Paartjie wat daarvan beskuldig word dat hulle 'n Kaapse polisieman geslaan en onthoof het, sal in die Wes-Kaapse hooggeregshof verhoor word.

Barnabas Sentiwe en Phumla Veli het Maandag in die Blue Downs-landdroshof verskyn in verband met die moord op konst. Monwabisi Mnyombolo in Oktober 2009, berig Daily Voice.

Landdros Deon van der Spuy het die saak na die hooggeregshof oorgeplaas, waar dié twee op 22 Februarie verhoor sal word.

Veli het haar borgtogaansoek laat vaar en aan die hof gesê dít sal help om die regsproses te bespoedig.

Sy en Sentiwe het na bewering die 29-jarige polisieman in hul huis in Mfuleni vermoor en sy lyk en kop in die agterplaas begrawe.

Mnyombolo is op 26 Oktober 2009 as vermis aangemeld. Sy oorskot is byna twee jaar later deur die nuwe eienaar van die huis gevind.
       
– Volg Nuus24 op Twitter

- SAPA